السبت، ٧ نوفمبر ٢٠٠٩

خنفروش لـ احمد الحيدر + فيلمcase 39 + مطعم ليلى من لبنان

السلام ..
شلونكم عوده مجدده مع بوست مزدوج مشكل كوكتيل ..
صاير عندي فائض بوستات ومابي احط كل واحد بروحه يطلع البوست سطر وربع اخليهم مع بعض اسهل جنها مجله شخبوطيه :)
البدايه اليوم مع كتاب خنفروش لـ احمد الحيدر..
مؤخرا بدأت بقرات كتب المقالات لكن هذه المره الاولى التي اقرا فيها هذا النوع لكاتب كويتي شاب .
وكما اسلفت الذكر الكتاب عباره عن تجميع لمقالات نشرها الكاتب في الصحف (القبس , افاق) , او في مدونته الكترونيه ..
وهي منوعه ذات طابع شيابي ممتع فقد تحدث عن قضايا يوميه محليه كلازدحام - الطيران - بعض اعماله سواء الحاليه ككتبه والمعارض او اعماله السابق الجامعيه كما تطرق الى الفن والفنانين و النساء !! .. والخ ..
عيبه انه كتاب صغير ومحتواه قليل :)
الجدير بالنشر رابط مدونته :
ملاحظة : اخر موضوع نشره في مدونته هو عن كتابه..
تحديث : في ال27 من نوفمبر2009 بعد قراتي لتعليق مؤلف الكتاب وجب التنويه :
ملاحظة صغيرة فقط إن الكتاب ليس تجميع لمقالات نشرت سابقا فقط .. بل فيه ما نشر وفيه ما لم ينشر وهو الأكثر .. حيث نشر خصيصا في الكتاب :) *
* احمد الحيدر..
#############################################
من جانب اخر :
بحول كويتي رحت اليوم الافنيوز ومرتين بنفس الاسبوع لنفس لمكان يعني مافي شي يسوى الهدوم وحفظتها والمحلات وصميتها ولو امتحان جان كرهته خخخ..
المهم قلت ندش السينما نضيع وقت ليما يفتح معرض الكتاب ..
ماكان بالي فيلم معين ولا اعرف شنو منزلين افلام بس قلت بشوف my sister keeper اذا لي الحين ينعرض او لا طلع يس ينعرض بس الساعه 11 بالليل وايد متاخر شفت الاوقات في باباي عقب ثلث ساعه وفي فيلم 2 بعد مانتبهت لاسمه قلت لاختي واخترنا ال2 اللي مانعرف حتى اسمه ..
رحنا نحجز فسالت امال التذاكر اذا الفيلم رعب او لا جان يطلع رعب استانست :) وحجزته ودشينا وبلش الفيلم ..
لا لا قبل لا يبيلش انا واختي قاعدين جان تسالني الفيلم عن شنو قلت مادري بطولة منو مادري شسمه هم مادري خخ طلعت التذكره قلت له اسمه case 39..
وبلش الفيلم ..
معلومات عنه من سايت السينما :

بطولة

Renee Zellweger, Jodelle Ferland

المخرج

Christian Alvart

النوع

رعب, اثارة

مدة الفيلم

109 min

تصنيف

18


القصة
العاملة الاجتماعية إميلي جنكينز تعتقد بأنها شهدت الكثير في حياتها العملية حتى تتسلم حالة جديدة والأكثر غموضا، وهي قتاة مضطربة في العاشر من عمرها تدعي ليليث سوليفان. ياكد أسوأ مخاوف إميلي حين تتاكد من ان والدي ليليث حاول قتل ابنتها، وهي ابنتهما الوحيدة. ماذا سيحدث للفتاة وإميلي؟<< الترجمه عجيبه شكله بقوقل مسوينها خخخ..
الرابط :
تعليقي:
اميلي احدى العاملات الاجتماعيات في رعاية الطفل في الولايه تتلقى القضيه ال39 لفتاة تدعى ليلي تعاني من الاهمال الاسري وسوء التغذيه والنوم في الفصل وتحول سيء في علاماتها الدراسيه , تلتقي بها اميلي وتتعلق بها حتى يصل الامر الى اعتنائها بها في منزلها الخاص وخلال هذه الفتره تتولى المتاعب عليها ..
شي 2 بالدعايه في لقطات ماشفتها بالفيلم لا انا ولا اختي فاتوقع قاطعينها مع انها عاديه جدا ..
الفيلم عجبني وفي جرعة رعب لدرجة انه غطيت ويهي وصرخت يمااااااا اشوه << بسم الله علي رقيقه خخ واختي غمضت عينها...
هذي عائلة البنت ..


****************************************************
المطعم هذا رحت له الاسبوع اللي فات وهو بالافنيوز واسمه ليلى من لبنان ..
عجبني ديكوره هادي وحسيت اني بلبنان :)
مشغلين اغاني لبنانيه ايشي دبكه اشي اغاني هاديه زين مني مسكت نفسي ومادبكت خخخ ..

المنيو احب هالستايل ودي لو كنت عايشه بهاالحزه ..

ع ما نختار الطلب شوفوا هالرسم ع الحيط حبيتها كتير ..




وهون شاشه بينعرض فيها دعايه لفيلم فيروز ..





وصلت المقابلات او الضيافه وفي نوع 2 خبز ماصورته بس حبيته لذيذ..




البيبسي بعد مكتوب ع قلاصه اسم المطعم بشكل حلو ولاحظت انه الورده مكرره بكل مكان تقريبا وهم الماي مكتوب انه اهو اللي يسقون في الارز ..

اختي تقول جان زين عندنا ارزه او شي مثلها قلت لها عندنا السدره اللي فيها ينانوه وعندنا النخل بس كلهم شالوهم الازاله :(




لقطه عامة مادري ليش صورتها ع مايي الطلب ..




وصل وصل فتوشي ..



تبولة اختي ..



احنا نسميه ملفوف بس العموم يسمونه ورق عنب هم لاختي ..


كبة بلبن لالي الكبه لذيذه بس لبن في طعم حمص شي جذي بس زين مو وااو مثل الكبه..



قرقشوا مخابيكم وخل ندفع الحساب :)

وبس سلامتكم ..

هناك ١٤ تعليقًا:

  1. ليش هالايام صايرين الي ينزلون كتب كلها تجميع حق مقالاتهم سواء كانت هذي المقالات بالجريده او غيره تتوقعين الهدف تجاري؟

    ما سمعت عن الفلم بس ذكرني بأورفان

    المطعم جربته ريوق وكان جدا عادي يعني ما افكر اروحله ريوق مره ثانيه ... بس سمعت عن الغدى والعشا قالولي حلو

    توني ماكله فتوش وتبوله لوووول بس احب الفتوووووووش اكثر يمييييييي

    احنا ببيتنه نسميه ""ملفوف"" بس لما اسولف مع رفيجاتي اقولهم ملفوف يقولون شنو هذا لازم اقول ورق عنب علشان يعرفون قصدي مادري ليش ههههههه

    اشوووووه طلعتي نفسي استانست لما قلتي ملفوف ههههههههه

    وبالعااااااااااااااااااااااافيه :)))

    مشكوره :>

    ردحذف
  2. هلا شاي..

    ماتوقع هبه يديده من زمان اعتقد امم يمكن يكون هدف تجاري بس من جانب 2 اتوقع انه شي حلو تيميعين كل كتاباتج بمكان واحد اللي اهو الكتاب..

    مي تو اقول لاختي كل فيلم رعب نروح له البطله بنت صغيره@@

    انا هالتجربه كانت غدا عيب المطاعم اللبناني ماكو وايد خيارات الطلبات تكون محدده مابين المقبلات السلطات والكبب والمشويات ..

    انا ماكل خضره من جذي ماذقت اكل اختي :) واحب الفتوش وايد..

    بالعافيه يارب..

    وناسه في احد يسميه ملفوف غيرنا خخ اهما يسمون الملفوف للابيض لاهانه !!

    الله يعافيج يارب مشكوره..

    والعفو ولو..

    حياج الله..

    ردحذف
  3. ذكرتيني بمطعم ليلى رحت انا مع رفيجتي بالعيد بس حنت فيروز صكت روسنا ماسوت علينا

    ردحذف
  4. هلا ماد..

    خخ بس اكلهم زين مو؟؟

    وحياج الله خيتو..

    ردحذف
  5. رووووووورووووووووو

    اليوم امي قعدتني من الصبح ورحنه الافنيوز عشان اشتري الحب لوووول رحت توقعت فاضي ولا زحممممممممممه والمطاعم بعد زحممممه شنو ماكو دوامات؟


    المهم حسنه ندور المحل مادري وين صاير فرينه وفرينه وفرينه لما وصلت عند الخريطه علبالي نفس دبي يجددونها بس طلعت خرطي قديمه لما اخر شي مليت وسألنا الي يشتغل ودلانه

    حسيت نفسي غبييييييييه لانه اول ما دشينه كنه صوبه بس انا حاطه ببالي انه الصوب الثاني لوووول

    المهم اني لقيت الهمداني بس مالهم صغير مو نفس الرفاعي بس خذيت ربع كيلو عن خاطري وخذيت حب شمسي حق اختي

    بعدين دشيت كليرز لووووووووووول واخيرا شريت الصبغ

    بس توهقت في نوعين واحد مغطاته تصير طواليه والثاني مدور مادري انتي قصدج عن اي واحد بس خذيت الطويل لونه احمر فاتح بس ما جربته ليلحين

    مليقين اهني ما يصير احط الصور جان صورته وحطيته لج :)


    مشكووووره وايد ... وسوري كتبت بوست عندج مو تعليق ههههه :)

    ردحذف
  6. بالعافيه عليكم

    انا اسميه ورق عنب لان الملفوف غير .. فيه ملفوف الفاتح هذاك اسميه ملفوف خخخخخ

    ماقمت احب الاكل اللبناني .. اللهم الا اذا كنت في لبنان ;)

    افلام الرعب اكرههاااا .. ماحب انقز فجأه من مكاني .. ولو اني رايحه معاج جان نشفت ريجج وتحسفتي انج ماخذتني لووول

    والكتاب قريت عنه في بلوق بوكوثر :)

    موجني بلشت التعليق بالعكس :)

    ردحذف
  7. هلا جاي..

    ولجم باج..

    في بس منحاشين الظاهره ..

    اي اهو بالسطره اللي جبال بروي ..

    لا مو غبيه انا كلش ماتوقعت انه بهالصوب لانه ماكنت مثبته اذا في محلات يدد ..

    بالعافيه يارب ..

    عاد عجبج؟؟

    انا جربتهم بالمحل..

    اي ملاغه مفروض يزيدون هالخاصيه..

    لا انا مالي جذي..

    http://trendygirl87.blogspot.com/2009/05/blog-post.html


    العفو ولو..

    اخذي راحتج البلوق بلوقج ..

    ردحذف
  8. هلا فيشه ..

    الله يعافيكم يارب..

    اي الاغلب مثلج فيشه..

    لمازا انا جربت 2 بنفس الاسبوع هذا عجبني اكثر..

    بالعكس وناسه لو انتي معاي جان هيصنا ..

    اي صح و انا بعد عرفته من بلوقه ..

    خخ لاعادي اخذي راحتج المهم علقتي عليه كله ..

    حياج الله خيتو..

    ردحذف
  9. بااااك

    انا ما خذيت هذا خذيت الثاني لانب ما احط غير الاحمر او الوردي ودرجاتهم ... والصغير شفت الوانه عندي نفسهم

    علشان جذي خذيت الطويل لقيت لون ماعندي بس ليلحين ما جربته

    ردحذف
  10. ولجم خيتو..

    اي هذا ماعرفه ماجربته بس شفت الوانه الفسفوريه..

    انا رحت شفتهم بس احس جنه الالوان غير عن قبل ..

    جربيه واذا عجبج قوليلي ..

    وحياج الله خيتو..

    ردحذف
  11. عاد تدرين رورو غرامي افلام رعب بالسينما !
    ادش و امسك بطني و اضحك !
    احلى شي لمن تمر لقطة تخرع اضحك على اللي حواليني اعرف واحد من ربعي لمن يخترع يقول "يمه" و بصوت عالي طبعا هذا الشخص الفلم الرعب معاه له طعم ثاني !

    ردحذف
  12. هلا اخوي احمد..

    اي احلى من البيت ..

    خخخ شكلك شمات ..

    وي حرام اكيد تضغطه و انت تحلل فلوس التذكره تشق اكثر من فيلم مره حده :)

    حياك الله اخوي..

    ردحذف
  13. مساء الخير .. :)

    بداية أحب أشكرج أختي العزيزة على الإشارة للكتاب والمدونة :)

    وإذا انتهيتي من قراءته أتمنى ما تبخلين بالنقد :)

    ملاحظة صغيرة فقط إن الكتاب ليس تجميع لمقالات نشرت سابقا فقط .. بل فيه ما نشر وفيه ما لم ينشر وهو الأكثر .. حيث نشر خصيصا في الكتاب :)

    بالنسبة لأفلام الرعب فمنذ مدة ما عادت تستهويني .. لا أشعر أن فيها جديدا ولا أدري هل أنا مصيب أم مخطأ ..

    أما مطعم ليلى فهو جيد بصورة عامة وشخصيا أعتبر نفسي من زبائنه .. فقط يعيبه نفسية وكثرة نسيان موظفيه لطلبات الزبائن وبعض التأخير :)

    تحياتي ..

    ردحذف
  14. هلا اخوي احمد ..

    مساء النور..

    العفو ولو ماسوينا شي حياك الله اخوي..


    اي انا ماعلقت عليه الا بعد ماخلصت منه وماشاءالله كان حلو ..

    وتوني اشوف ردك مشكور ع التعليق والتوضبح بصلحه ان شاءالله..

    بالنسبه للرعب توني هابه فيهم فمعظم افكارهم تكون جديده علي كمتابعه او مشاهده بالاحرى لكن المعلومات اللي وارده ساعات اكون قاريته لانه اقرا رعب وايد بينما اعتبر مشاهده يديده لافلام الرعب..

    المطعم ع حظي كان فاضي مو اهو بس المجمع بكبره واذا المكان فاضي اتعدل الخدمه ..

    زين قلت لي عساس مانروح له بالزحمه :)

    مشكور وحياك الله..

    ردحذف

دوركم تشخبطون :)