الخميس، ٧ يناير ٢٠١٠

بكلية الشريعة تهزأت فبكيت ..

السلام ..
قبل فتره نزلت خاتون بوست عن مواقف المحرجة بالجامعة المهم حزتها تذكرت موقف خايس مريت فيه باخر كورس لي هالكورس كان متروس مواقف مش ولا بد اهي اهي..
الله يسلمكم احنا كنا ميداني وكانت كل بنت تغطي اخبار كليه معينه ورفيجتي بالشريعه ..
ومره في ندوه بتغطيها فحزتها انا موجوده بكيفان بحكم انه محاضرتي الي قبل البريك انجليزي فاخذها بكليتي مو مثل باجي المواد بالشويخ المهم مالكم بالطويله..
رحت معاها وياريتني مارحت ولا اشوه رحت خخ بعد شوي بتعرفون ليش ..
قعدنا نحوس ندور مكان الندوه قالوا بالمسيد وفي مكان للحريم قلنا اوكي نروح وبهالحزة كان زحمه لانه صلاة وفوقفنا اخر الرصيف يعني بينا وبين باب المسيد جم متر فاللي بدشه مايمر صوبنا لانه بعاد ومروا وايد صبيان والوضع طبيعي ماوعينا الا بهاللي ياي من اقصاه ويصرخ ويقول يابنيه روحي لاهلج ..
انا طبعا ويهي انصفق اتصروعت وخطتين مشيت جان ابجي خخخ امبيه خرعني عسى ماشراحمد ربك اني محترمه وماداحر رياييل ولا جان غسلت شراعك وقلبت الندوه من ندوه مادري شسمها لي سماحة الدين وغض البصرواخلاق المسلم السوي ..
لاتشوفون شكثر بجيت امبيه انا حسبالي بروحيالليابجي لاني ام دميعه ماوعيت الا رفيجتي دموع بعد مع انه دمعتها عزيزه ع قولتها بس يمكن لانه طفح الكيل ..
والادهى انه المحاضر بالندوه وايد متشدد ع غيرسنع امبيه اخلاق المسلمين مامرت عليهم الظاهر وللاسف انهم يمثلون كلية الشريعه احنا شفنا دكاتره وايد مو جذي وبس وهم مطاوعه عاديين مو دكاتره بس اخلاقه من اروع مايمكن وهذا الصح ..
اهو الطيب مايدرس بنات اوكي كيفه البنات ماراح تموت ولا بيطوفه اشي اذا مادرسهم بالعكس احسن لهم بس ماتوصل درجة رفيجتي تساله يسكر الباب بويها عيب اهو سكره انا صرت جذي @@
والباب قزاز فشافني الظاهر حسباله انجلطت فتح الباب وحاجها بمنتهى الدفاشه تساله عن الندوه يقولها العنوان بس تقول شنو محاورها يردعليها العنوان مره2 تقول اي تحاول تسحب حجي ماكو يقول لها بالندوه تعرفين شدعوه عليك ..
المهم نرد لي البكاءالجماعي وعقبشفنا بنات من الشريعه يقولون لنا روحوا الندوه في مكان للبنات قلنا عوع مانبي ..
وهسترنا نبجي ع نضحك اقولها ماتخيل شكلنا داخل رفيجتي ترد تقول ما يبلش الندوه الا لما يطلعونا لن ابداالندوة بوجود هاتني الفاجرات خخخ استغفرالله..
عاد ارد امبيه الدين المفروض يغض البصر مو يخوزر ويصرخ ع بنات الناس ..
مايقول الا الله يهديه ولا يبلانا يارب..
تذكرون قلت لكم اشوه انه رحت لها..
لانه كان حزتها عندنا كل اسبوع بالميداني نسوي مادة صحفيه فكان باجي لنا مقال فكتبت عنه وانشر بافاق شنو استانست :)بس هم لازلت حاقده عليه ..
والمقال منزلته بالبلوق وتوني اكتشف انه كان اول بوست خخخ ..
*بسم الله الرحمن الرحيم *
قشور الدين ..
بكي بورد : رورو الشخبوطه
كثيرا هم أولئك الذين يهتمون بالمظاهر ويتناسون الاهتمام بالجوهر الذي هو أساس شخصياتهم فلا يعملون على صقله أو تنميته بل يسارعون على اقتناء آخر صيحات الموضة التي تساعدهم على تجميل مظهرهم الخارجي ، ولا يقف الأمر عند هذا الحد بل يتعداه ليكون لهم معيار ومقياس لحكمهم على الآخرين ، ولكن فحوى هذه الظاهرة انتشر بكل آسف ليصل إلى الدين الإسلامي الحنيف.
أن تبتعد عن جوهر ولب وأساس الدين ولا تأخذ منه إلا المظهر والذي يتمثل بتقصير الثوب وإطلاق اللحية بالنسبة للذكر أو الحجاب الإسلامي للفتاه (أنا هنا أوضح فقط ولست أعمم) والاكتفاء بهذا الشيء دون تعلم أهم وابرز أحكامه وقواعده وتطبيقها هذا هو المقصود بقشور الدين، وهذه الفئة انتشرت للأسف في الآونة الأخيرة هي فئة شاذة ضالة اهتمت بالشكل وجعلته كستار لتصرفاتها ، وأغفلت عن الجوهر المتمثل بالأخلاق الكريمة والقيم الإسلامية الفاضلة ،و التي دعانا الدين الإسلامي لها وأوصانا بالتحلي بها ، و لعل ابرز الأمثلة عليها هو حديث الرسول صلى الله عليه وسلم في حجة الوداع (إنما بعثت لأتمم مكارم الأخلاق )، وفي رواية أخرى: (إنما بعثت لأتمم صالح الأخلاق ) فغاية دعوته عليه الصلاة والسلام أن يتمم الأخلاق؛ أخلاق الناس بينهم وبين الله، أخلاق الناس بينهم وبين أنفسهم، وبينهم وبين بعضهم البعض، يتمم صالح الأخلاق ومكارمها وأحسنها، فكان أفضل الناس خلقاً عليه الصلاة والسلام ، وتكون الأخلاق في حسن المعاملة و احترام الآخرين والتعاون والبر والإخاء ، فأساس الدين هو اليسر وليس العسر ، لكن هذه الفئة للآسف تعامل الآخرين بتزمت وقسوة ،لذلك فان دينهم للأسف ما هو ألا قشور لو أزلتها لنصد مت بفراغهم الداخلي من سوء معاملتهم وعسر تصرفاتهم وظنهم السيئ بالآخرين ، أي أنهم بتصرفاتهم ينفرون الناس من الدين والالتزام به أو الدخول به فالحكم الأولي لهم من خلال مظهرهم هو أنهم من رموز للدين ،وقد تكون الطامة الكبرى لو كان هؤلاء الأشخاص هم الدعاة للدين ولعل خير مثل واستناد لهذا الأمر في قول الله تعالى في كتابه الحكيم (ولو كنت فظا غليظ القلب لانفضوا من حولك(.
ومن وجهة نظري المتواضعة فاني أرى إن هذه الفئة لا يصلح حالها إلا بتغيرها لنفسها وذلك برجوعها لله ولفطرة الإسلام السليمة فقد قال الله تعالى في سورة الرعد ﴿.. إن الله لا يغير ما بقوم حتى يغيروا ما بأنفسهم ٍ.. ﴾ ، وباقتدائها بخير المرسلين محمد صلى الله عليه وسلم نسبة لقول الله تعالى في سورة الأحزاب 21: ( لقد كان لكم في رسول الله أسوة حسنة) .
*عنوان البوست ع وزن رواية باولو كاويلو ع نهربيدرا جلست فيكيت شغله جذي:)

هناك ٢٠ تعليقًا:

  1. ويييي موقفج صج لا تحسدين عليه ..

    طول ما انا قاعدة اقرا واتخيل الموقف اتنرفز زيادة!!

    شدعوه؟؟!! شصاير؟؟ يعني هالأخ ما يشوف بنات بالشارع؟ لو احنا مو بالكويت جان قلت يمكن! بس بالكويت ويصرخ جذي؟؟ ليش؟؟ شمسوية؟؟!!

    الله يهديهم بس ويفهمون الدين عدل ويحببون الناس فيه بدال ما يكرهونهم!

    ردحذف
  2. هلا انجو..

    جانزين يحسدونا ع هالمواقف عشان ماتكرر خخخ..

    اي حده ينرفز ..

    قليل ادب و دفش ماعليه شره ..

    المصيبه انه كنا بعاد وبحالنا مو اللي نتنهوص ونضحك ونستعبط ..

    امين يارب..

    ومشكوره..

    ردحذف
  3. أمر غريب محير
    بس اعتقد درس يجب الاستفاده منه

    ردحذف
  4. افففف حده ينرفززززز شدعوه اذا شاف بنيه كفر؟ وليش يشوف اصلا اذا بققوا عيونهم ما يشيلونها

    يعني النظره الاولى حلال ويقعد يفصلج عدل ولا يشيل عينه

    مره كنت رايحه الشريعه حق دكتور وكان وقتها برد ومطر وكنت مغطيه شعري بالسكارف عن المطر

    اول ما دشيت المبنى جان انزل السكارف ولا بويهي شباب حدهم انصدموا عبالهم قطيت حجابي ههههههههه

    وطول الوقت يخزون نرفزوني جنه اول مره يشوفون بنيه

    وياما تحت السواهي دواهي

    مشكوره

    ردحذف
  5. هلا اخوي عين ..

    غريب انه ننزف ؟؟

    مادري عادي العاده يستغفرون او ينحاشون لي مرينا بس صراخ اول مره تصير ..

    الاستفاده انه مره 2 اقوي قلبي ووقفه عند حده :)

    حياك الله اخوي..

    ردحذف
  6. هلا جايونه ..

    اي قطع ليش تشوف مو حرام ولا الدين ع مزاجك ..

    واي رفيجة اختي هم مو متحجبه كل ماتروح الشريعه عندها ماده تلقى حاطين لها شي ع سياره ع ابو بيهدونهاولي مرت يستغفرون ..

    صاجه ..

    العفو ولو ..

    حياج الله..

    ردحذف
  7. اتصدقين بط جبدي !! الحمدالله والشكر مااااحب هالاشكال .. يعني شفيها اذا رد على البنت عدل وباحترام؟ محد رجعنا الى الخلف الا هذيله :(

    ردحذف
  8. هلا فيشه..

    افكورس اصدق :)

    ولا انا احس فاهمين الدين غلط الله لايبلانا يارب..

    وحياج الله اخيتي..

    ردحذف
  9. والله يا اخت شخبوطة بما أني كنت طالب بكلية الشريعه يمكن تكون سالفتج صح

    انا ما اقدر القي اللوم عليه او عليج لأني ما ادري عن لبسج ولا عن طريقته بالكلام

    انا ما اتكلم عنج انا اتكلم الحين عن البنات الي كأنها داشه ديسكو ويايه تفتر عند طلبة الشريعه

    يعني الواحد منهم مصبر نفسه وصاينها وتييج الاخت تتبختر جدامه وماتبيهم يكلمونها

    اذا اللبس ماكان مناسب للمكان لاتدشين

    يعني انا ماعمري شفت واحد لابس شورت وداش مسيد أو وحده لابسه بوشية وداشه مرقص

    فا الوحده اذا تشوف انه لبسها مايليق بالمكان وهو الأغلب على بنات الجامعه للأسف

    من اليقنز لي التريننق لي هالجينزات الي ما ادري اشلون يدشون فيها

    وبعدين يقولون حق الشباب يا اخي غض بصرك !!

    لا والله انتي لبسي عدل مو انا اغض بصري !!

    انا اقول السالفه ما اعرفها ولكن قد يكون هناك اخطاء من البعض الصحابه كان فيهم الشديد مثل عمر واللين مثل عثمان

    ردحذف
  10. ويه ويه ش
    عوه عليييييييك؟ ليش اتخوزر دام مو عاجبك؟ استغفر الله

    ياعمري انتي عاملتيه بالحسنى وانتي خذيتي الأجر .. هالفئة عبالهم اهما اللي بيدشون الجنه والباجي بالنار .. صدقيني يكفرون ابعض ع هاذا اللي ودانا وره انهم مخلين القضايا المهمه وقاعدين يلمعون بالقشور على قولتج

    ابشرج اكو دكتور دين بالآداب معروف مو متشدد .. بس تزوج طالبه ويانا .. واذكر لمن كانت هند البلوشي معانا بمقرر.. كانت تيي تكلمه فا يطالع صدرها ويقول ماهاذا ياهند؟ يعني عتب ويا ويهه .. تخيلي قاط عيونه داخل صدرها استغفر الله

    حبيبتي انتي .. هاذا يوم سيء في حياتج اكيد تذكرينه تضحكين الحين من هالاوادم

    حبي واكثر

    ردحذف
  11. هلا اخوي بو فلان..

    مهما كان لبسي فمو من حقه يكلمني بهالشكل يعني لو فري وبيصرخ علي بلبس عباة بوشيه @@

    لا طبعا وبعدين وايد مروا قبله ولا واحد تحجى شمعنه اهو يتفرعن عسى ماشر..

    احنا نلبس لبسنا المعتاد اللي نلبسه بالسوق و بكليتنا مو معقوله انافق ونلبس عباة عشان شباب الشريعه بس اللي اهما المفروض لو البس عباة وبوشيه يغضون بصرهم عني ..

    اي صراحة مو من حقه يكلمها وخصوصا بهالاسلوب الخايس .. حتى لو بينصحها النصيحه بسلوب مو جذي وماعتقد ايوحده بتتقبل ريال غريب يكلمها ..


    واذا الدييني يتمادون فما بالك بالعاديين ..

    ومثل مالبس له حدود غض البصر واجب ..

    وحياك الله اخوي..

    ردحذف
  12. هلا الوتين ..

    خخ عاجبته ولا مو عاجبته مايخز ولا يصرخ ..

    اي الله يهداهم ولا يبلانا يارب..

    امبيه عاد هند تتستر الله يهداها يارب مو حلو هالستايل لاتتحجب بس تستر نفسها ..

    لا تصدقين يرتفع ضغطي منه خخخ ..

    حياج الله اخيتي..

    ردحذف
  13. أعجبني مقال قشور الدين
    هي فعلا قشور لدى البعض ولا تتعدى المظاهر ..
    وكم من سافرة أو غير ملتزم يملك أخلاقًا أفضل من غيره ..
    طبعا لا نعمم أبدًا ولا نطلق أحكامًا عامة .. فكثيرون هم الملتزمون شكلاً ومضمونًا ..

    اتنرفزني شغلة وحدة .. اذا ييتي حق المو متحجبة او مو محتشمة وقلتيلها ليش ماتتحجبين قالت انا احسن من غيري المتحجبات واخلاقهم صفر ..
    هل يعني اذا تحجبتي راح تتغير أخلاقج؟
    الزين يكمل بعضه
    وحلاة الشي كامل .. حجاب وأخلاق :)

    شكرًا رورو :)

    ردحذف
  14. هلا بوك ..

    هذا انتاج مابعد الزفه خخخ..

    اي الحمدالله عند البعض مو الكل..

    انا ماتهمني متحجبه او لا المهم الاحتشام باللبس و الشكل يكون مو ملفت ..

    مع انه من مؤيد يالحجاب بس عقب نه البنات هولوا فيه ع ابو ستايل فعندي تاخذها بالتدريج وتتحجب واهي راح تعطيه حقه..

    اي صاجة الحجاب حلو مع الاخلاق ..

    العفو ولو..

    حياج الله..

    ردحذف
  15. وي شفيه هذا!! ماعليج منه تلقين هالنمونه من الي يدعون الدين ويسوون روحهم كلش متشددين من بره بس ومن من داخل ودهم ينطون فوق الحرمه..

    وخوش مقاله مشالله

    ردحذف
  16. السلامـ...
    وناسة طلع اسمي بالسحب
    أأيدج بكل كلمة قلتيها
    أنا لمن مرة خذيت مقرر أختياري
    أكتشفت مآسي طبعافي الخيرين كثار
    و على ما قالوا لو خليت خربت
    لكن شفت هناك أشياء ما توقعت أشوفها
    مثل عدم الانضباط و الالتزام بالوقت
    و ناس داخلة و ما تبي تدخل و ناس فضة
    بالتعامل المهم ما أبي أكثر...
    لكنالحمد لله بالنهاية طلع معاج مقال
    يسوا وراقي بصراحة يمكن في ناس يهاجمون هالنوع من المقالات على الرغم من أنه الشخصيات المذكورة ما نزل فيها قرآن للأسف صار عندنا خلط بين الدين و الشخصيات اللي تنخش وراه.
    تصدقين جني قريته مقالج و مر علي من قبل بآفاق ؟!
    تشكرات أفندم :)

    ردحذف
  17. هلا مدمد..

    ويع قطع ..

    الله يهديهم يارب,,

    ومرسوو خيتو..

    وحياج الله..

    ردحذف
  18. هلا والله خاتون ..

    وعليكم السلام والرحمه ..

    الفال لسحب البوش خخخ..

    اي صح انا حسبالي الدييني التزام بكل شي ابسط الامور طلع مو كلهم جذي ..

    اي الحمدالله كل شي خيره ..

    صج عسى مايون لي المقال احس ماجرحت احد بس وجهت نصيحه عقب مانزفيت خخخ..

    انشر ب2008 الكورس ال2 كان مادري اذا لحقتي عليه او لا :)

    عفوات حياج الله خيتوو..

    ردحذف
  19. <<< قاااعده تضحكـ

    اتخيل شكلج انتي وسوسو تبجون خخخ

    حسافه ما كنت موجوده

    ومابقى نزلتي الموقف

    تشكرات اوختي

    F6o6a

    ردحذف
  20. ياشماتت فطفوطه فينا خخخخخخخخخخخ..

    اي طافج جان لعلعت عليه او بجيتي معانا :\

    خخ ع ابو بخلص كتاب لايق مع هالسالفه بس ضاع @@

    والعفو اخيتي ..

    حياج الله..

    ردحذف

دوركم تشخبطون :)