الجمعة، ٤ ديسمبر ٢٠٠٩

كابتن مصر لـ عمر طاهر + سوالف وذكريات ..

السلام ..
واخيرا انتهيت من قراة كتاب لانني مؤخرا بدأت بتصفح بعض كتبي ورواياتي وقراءة بضع صفحات منها من ثم رميها :(
عموما كتاب اليوم يحمل عنوان (كابتن مصر.. البوم ساخر للمراهقين)

يعد هذا الكتاب ال3 من حيث الاعمال التي تابعتها سواء قراة او مشاهده لمؤلف عمر طاهر ..

وفيه يتناول الكاتب قضايا وظواهر بارزه بحياة كل مراهق باسلوب شيق وبسيط وممتع من خلال 15فصل ..

ولعلل المميز باسلوبه انه مناسب لهذا العصر من حيث الفاظ او التكنولوجيا المطروحه فيه (فيس بوك - شات -نغمات -ايميل ..الخ) بالاضافة للاستخدام المعرب (الكتابه بحروف انجيزيه لكلمات عربيه اكره هالشي :\ والحمدالله كان مقتصر استخدامها ع عناوين الفصول)وملائم للفئة المستهدفه و هي المراهقين .

ال15فصل كالتالي :
1-الجمجمه دي فيها ايه ؟؟

معظم ماطرح فيه اسئلة حول مختلف مجالات الحياة ..

ex:ليه سوبر مان يلبس الاندر وير بتاعه على هدومه من بره؟؟ <<( صج ليش يمكن لانهم ماركه خخخ )

2- تحب تطلع ايه لما تكبر ؟؟
عن اسئلة الكبار للاطفال والخ ..
3-ليه بنكره المذاكرة ؟؟
وفيه تناول تخصيطنا للمذاكره وتطبيق وعوامل التشويش التي تاثر عليها , ثم تطرق لاسباب كره المذاكرة , ومن ثم اشار الى كيف نحب المذاكره ولكي تحدد الاجابه يجب ان تعرف لماذا انت تذاكر ؟؟ ’ واثناء شرحه عرض بعض المواد الدراسيه والهدف الاساسي من تعلمها .
4- ياترى جدي وهو كان طالب كان عامل ازي .؟؟
مقارنه بين الطلبه في السابق والطلبه الان ..

5-ازي تعرف ان الاجازة بدأت ؟
عبارة عن عرض لبعض المواقف ..

6-ليه اكل الشارع احلى من اكل البيت ؟؟
مقارنه بين اكل الشارع = المطاعم واكل المنزل << انتوا شنو تحبون اكثر ؟؟

7-من فضلك علمني الغلاسة ؟؟

اتوقع معنى الغلاسه هي الدم الثقيل , عرض مميزات الغلاسه ومواقف تبين مداها او بالاحرى تبين انك غليس اذا فعلتها خخ..

8-حدث في مثل هذا اليوم (قصص واقعية )
مجموعه من القصص الواقعيه الاطفال ومراهقين ..

9-لو بطلنا نسأل نموت !
مجموعه من التساؤلات لكن هذه المره بشكل عنوان لمقال ثم تفسيرها بمقال امم احببت معظمها مثل سؤال الاصنصير ؟ و المايوه صح ولا غلط ؟ و الحمدالله ع ايه ؟؟


10-من اللي قال البنت زي الولد ؟؟
اسباب ومقارنات تبين الاختلاف بين الجنسين ..

س: لو كنت من الجنس الاخر ماذا كنت ستفعل وهل تعتقد انه حياتك ستتغير ؟ << السوال للبنات والصبيان ..

عن نفسي اي طبعا بتتغير كوني صبي يعني مجالات المختلفه بتكون اسهل متوفره اكثر بدرس برا عادي و فرص الوظيفيه اكثر من واقع تجاربي الوظيفيه انه التفضيل للذكور بس لانه ذكر رغم انه قدراته اقل , ماراح اخاف بطلع بالليل عادي بسوق داري بترتب بروحها اغراض بتصير اقل ماحاتي شبلبس بعرس او عزيمه او عيد او حتى عزا الله يسلم الدشداشه وعموما الولد وايد معطينا حجم اكثر من اللي اهو يستاهله ساعات مو الكل وخاصة اليدات لانه متربين ع انه ريال فهو احسن اما الحين لا احس نوعا ما صار في مساواة بالمشاعر بس لكن الوظيفه وغيره لا للحين احنا مظلومين :\
هم بحب بتزوج اللي احبها طبعا اذا الله سهل ..<< ميزة لنا انه اهو اي لي عندنا مو احنا نروح لهم خخخ ..



11-ليه لما بابا بيقول ان شاءالله بيكون اقصده ان شاءالله لا ؟؟
عباره عن شرح مصطلحات الوالدين ..

12-تحب تكون مشهور ؟؟
اختبار تختار شخصيه مشهور من عدة شخصيات مطروح ثم تتعرف ع شخصيتك من خلالها ,,

13-مين ينفع يكون مثلي الاعلى ؟؟
عرض لقصة بحثه عن مثل احلى بين المشاهير و من حوله ليتعلم انه المثل الاعلى هو من تتعلم منه لا من تقلده فتصبح نسخة مزيفه منه ..
14-ازي تعرف انك مراهق ؟
عرض للمظاهر الفسيلوجيه و البيلوجيه والحياتيه التي تبين انك في مرحلة المراهقة ..

15-هيا كلمة صايع كانت شتيمه زمان ؟
مقارنه للمدلول كلمة صايع بين الماضي والحاضر ثم الختام بنصائح مفيده على سبيل المثال :

1-الصبر هو الحاجة الوحيدة اللي لازم تستعجل وانت بتتعلمها ..
2-اول خطوة للنجاح انك تعرف انت عايز ايه..
3-اوحش حاجة انك تكون مابتعملش حاجة , لانه يبقى صعب تعرف هتخلص امتى ..

ملاحظ الكتاب معظمه باللغة العربيه الفصحى :)
#####################################

ع طاري الدراسه كنت مجهزة جم سالفة ونسيتهم ,,

خل ابلش باختي الصغيره بعاشر يعني 2 ثانوي ومن لما كانت ب8 واهي مجابلتني كل يوم بتدرس شي مره علم نفس مره تقولي عادي ادرس اعلام قلت لها اي قالت ترضين اصير مثلج !! بقلبي حشى ملكي الخاص خخخ ..

ومره بتخصص هندسة كمبيوتر بالمعهد التجاري خخخخخخخخخخخخخخخخخخخخخ ماخبرت هالتخصص موجود فيه امبيه خخخ انا حسبالي بس انا اللي قالت لي عنه بس مره كان عندها مدرسها واسمعها تقول انه بتدش هالتخصص واهو يسيرها يقولها اه بس دبلوم خخ ماكسر بخاطرها ..

ومره دشت المستشفى لما زرناها جان تقولي ابي ادرس تمريض !!

هالفتره هابه انه بتدرس برا لوعت جبدي بهالسالفه وكل يوم سوال غير اليوم تقولي اتفضلين سكن بشقه ولا السكن الجامعي قلت لا اصير هومليس احسن !!

ع طاري طموح اختي ..

حققتوو طموحكم ..؟؟

انا كنت ابي اعلام واستانست اني تخصصته بس عقب لما تخرجت وطحت بجبد نفسي قلت لو داشه تربية رياض اطفال ابرك لي مع انه وع بس دوام اقصر احتكاك باليهال احسن من الكبار و مايبله غني ورقصي خخخ و دوام قريب من بيتنا صج اروح مشي ع قولة ابوي ولي تاخرت اركض :\

والاجازه يابوي 3 اشهر خخ ..

كنت بقول شي ونسيت ..

اختمه لانه مخي قفل ..

تذكرت مادري ميزه ولا عيب اني ادش المدرسه مبجر !! يعني اللي عقبي بسنه خذوا الانجليزي من اول ابتدائي والحاسوب من المتوسطه <<حسب المدرسه انا فلست من الاثنين ..
بالجامعه اللي عقبي زادوا شعب تخصصنا من 2 صاروا 4 !!
لا وينحسب لي اني اكبر منهم مع انه مثل المواليد اهي اهي ..
يعني حتى ميزت اني اخلص تعليمي مبجر طلعت خرطي الا شويه :(

هناك ١٦ تعليقًا:

  1. اي والله تصدقين مادري ليش اكل الشارع احلى من البيت

    يمكن لأنه خدامتنا ما تعرف تطبخ؟؟؟

    مادري تصدقين جم مره اسأل روحي هالسؤال.. يعني حتى لو كان الاكل محزر من مطعم مضروب همن احلى من البيت

    لوووول

    تصدقين حتى انا متحسفه قد شعر راسي على تخصصي

    ردحذف
  2. هلا موم..

    خخخ ..

    ماجوبتي ع سوال اذا انتي صبي بتتغير حياتج وشنو بتسوين ؟؟

    انا مو متحسفه منصدمه لانه كان معطينا امالره انه تخصص مرغوب وقوي واخر شي طلع ماكو شي بدون فيتامين وااو ..

    وحياج الله..

    ردحذف
  3. وي عاد انا كله اقول يا حظهم الي يدخلون المدرسه مبجر بس بحالتج لا طلع مو شي :s

    ردحذف
  4. أزال المؤلف هذا التعليق.

    ردحذف
  5. هههههه اختج الصغيره اللي بعاشر ذكرتني بوحده "أعرفها" لووول

    ردحذف
  6. ترى حذفت الرد عشان نسيت شي ..بالاقساط لوول

    س: لو كنت من الجنس الاخر ماذا كنت ستفعل وهل تعتقد انه حياتك ستتغير ؟ << السوال للبنات والصبيان ..

    الريال اذا ضاق خلقه بالليل عادي يطلع مو احنا لي ضاق خلقنا انبطحنا بهالفراش مسكين لو عنده السان بقول بس فجي عني شوي و بعدين ما راح يحاتي احد بيتحرش فيه او بقول هذا شمطلعه هالحزه ..والسفر بعد على كيفه ما ينطر محرم يتعطف عليه ويوديه ..ومايحاتون سالفه مكياج ولبس وشعر حف وشيره وآخر صيحات الموضه... ومهما يسوي شايل عيبه والحلال عندهم حرام عندنا ..هذا غير ان يقدر يحب الي يبيها مو احنا يا حسره بس نبحلق بعيونا ونقمت بقلوبنا

    بس هم ارجع واقول الحمدالله اني بنت :d


    وبالنسبه لسؤالج عن الطموح يرحم أمج لا تقلبين المواجع خليني فيك نسيت خخ

    وخو انتي عارفتني وعارفه اذا حققت طموحي ولا لأ !

    ردحذف
  7. هههههههههههه امبيه تحفه

    قوة رورو؟ شلونج يالغاليه؟!

    الكتاب عنوانه ما شدني بس لمن قريت المحتوى شوقني حيل .. موين نييبه رورو؟

    بخصوص اختج ما تنلام والله شي يحير .. لما الانسان ما يكون محدد هدفه من البدايه بيتعب ماعليه تحملوها علشان ترتاح المسيجينه ولا تتعب .. بس هندسة كمبيوتر مو جنه تكنولوجيا؟ يحلوها مضيعه :*

    اما بخصوص تخصصج .. فعلا قالولي درسي شي انتي تحبينه .. ودامج حابه الاعلام صدقيني منتي متحسفه .. اهي مسألة وقت على قولة رويشد .. تخيلي نفسج وين بتبدعين؟ مجال محبب ولا مجال يوككل عيش وبس؟

    رياض الاطفال متعب أكثر منا احنا المتوسط وغير جذي فلوسج تقضبينها من هني طايره ثاني يوم على بروجكتات ومشاريع مالها آخر ولا منتي ماخذه امتياز ولا بطلون بويهج للأسف هاذي التربية تلحالية .. قتلج التدريس حلو وينن . الخلل بالنظام للأسف .. يهمهم المظهر لا الجوهر .. وعلى قولتهم لي حبتك عيني .. ما ضامك الدهر .. هذا غير بيئته اللي كلها حش وقرض أشكره مشكره ونفاق .. وهالشي موجود صح بكل مكان بس مشكله لي احتجتي شي من احد اووووووووه عالمنه

    عالعموم الخيره فيما اختاره الله .. وتخصصج من أجمل التخصصات اللي اذكر كان عليها طق عصي ايامنا .. عدل؟
    وان شالله تبشرينا بوظيفتج :*

    حبي

    ردحذف
  8. السلام عليكم

    س: لو كنت من الجنس الاخر ماذا كنت ستفعل وهل تعتقد انه حياتك ستتغير ؟ << السوال للبنات والصبيان

    والله الصراحه ما اتمنى اكون صبي ... كافي ان الجنه راح تكون تحت اقدامنه لما نكون امهات انشاءالله


    واذا كان السؤال لو كنت شيء ثاني؟

    اتمنى اكون فيله ههههههه

    ----------------

    الحمدلله انا من لما كنت بالثانويه وكنت ابي تخصص علوم سياسيه ودشيت الجامعه على طول بدون تفكير وتخصصت لاني كنت حابته ... والحين انقردت فيه هههههههههههه

    غلطانه اذا بتفكرين برياض اطفال رفيجتي توها مشتغله كل يوم تبجي والحين تبي تطلع تقول تاخذ الراتب وعلى طول تقطه على الوسايل والعفسه وغير هذا الموجهات ما يقدرون واهيا مسكينه 24 ساعه تكرف واذا يتها الموجهه واليهال قاعدين يصرخون ومسوين لويه اهيا الي تتحاسب وعيال هالوقت شسكتهم

    اشوه انا خذيت انجليزي من 1 ابتدائي وخذيت حاسوب 1 متوسط واذكر كنه شياطين نشبك من ورى الابله لما جكتنه وزفتنه بس شافت ماكو فايده جان تنقلب الحصه واحنا قمنه نعلمها على النت لوووووووول

    مشكوره :)

    ردحذف
  9. هلا ميد..

    خخ اختي طلعت كيزه للي صيرون مع اللي كبرهم خخخ..

    خخخ اي مثلي تقريبا حياتج بتتغير :) واي انا بالنسبه لي البنات احسن من الصبيان :)

    وع الطموح خخ الله كريم اهي اهي ..

    وحياج الله اخذي راحتج البلوق بلوقج خيتو..

    ومرسي..

    ردحذف
  10. هلا انجينر ..

    اخاف تعرفين اختي خخخ ..

    وحياج الله..

    ردحذف
  11. هلا والله الوتين ..

    الحمدالله الله يسلمج ..

    انتي ازيك؟؟


    انا ماخذته من ارض المعارض من الدار نفسها اللي ناشرته بس لما افتر بالمكتبات الحين اغلب الكتب ملوت المعرض فيها اتصلي ع العجيري تاكدي اذا موجوده او لا ..
    خخ واهي تبي ادبي بعد فحتى التكنولوجيا ماياخذونها ..


    اي احب الاعلام واحب ابدع بمجال احب بس دوامي مافي ابداع :\

    اي كل مكان جذي بس انتوا بزود يمكن لانه حكره مو مثل باجي الدوامات انا رفيجتي مدرسه مره ساعدت وحده وعقب ابتلشت فيهم الله يعينكم يارب..

    اللي اعرفه اي ولي الحين مرغوب عيبه بعقب التخرج ..

    مرسي الله يسلمج يارب..

    وحياج الله..

    ردحذف
  12. هلا والله بجاي..

    وعليكم السلام والرحمه ..

    اهو مو تمني ويع لا ان شاءالله اقلب صبي احس جنه الله خسف فيني خخ بس اقصد كتوقع بتفرق وتتغير حياتكم ولا عادي :)

    لهدرجه خخخ..

    مثلي انا من الثانويه كنت ابيه ولازالت احبه بس هم مثلج انصدمت :\

    والله يرزقج الوظيفه السنعه يارب..

    خخ من صجج بس لو انا تربيه بصير ابلة روضه اما ثانوي ومتوسط او صبيان لا ماضي بالمدرسه اسود خخخ..
    ميزة الروضه مافيها امتحانات او درجات ..

    و اي انتي مثل مواليدي بس انا سبقتج لانه مواليد اول السنه ..

    وناسه خخ صار تبادل خبرات ..

    والعفو ولو حياج الله..

    ردحذف
  13. لا والله ما أعرفها .. بس أعرف وحدة "نفسها" .. ما بقى شي ما تبي تدرسه .. من طب .. هندسة .. مدرسة .. مضيفة جوية لول .. كابتن طيار .. سفيرة ههه .. عالمة فلك .. الخ << شرايج بس بالميول؟ :)

    ردحذف
  14. ولكم باك..

    خخ الظاهر مانتر هالسالفه يعني اشوه في مثلها خل اقولها :)

    حياج الله خيتووو..

    ردحذف
  15. السلام عليكم ...كيفيك؟

    الكتاب شكله حده عجيب من وين شريتيه؟ عفية لا تقولين من بره

    و بالنسبة لأختج عسى الله يوفقها و قولي لها
    اللي مكتوب و مقدر راح تآخذه
    بس أهم شي خل ترضي الوالدين و تسمع كلامج*_^
    و تدور على اللي تحبة و تلاقي نفسها فيه مدة طويلة و تقدر تبدع فيه و على العموم حتى لو ما عجبها الي تبيه تقدر تحول .
    اجابة على سؤال حققتوا طموحكم ؟
    للحين أي و راضية عن حالي كتير كتير
    وعليه كسرتي خاطري:( أنتي من الي كاسبين سنة مثلي بس انا لحقت على الانجليزي الشي الوحيد السيء كان اني درست الكورسين بالفاينل و اللي وراي لأ *_^ الخيرة فيما اختاره الله ^_^

    ردحذف
  16. هلا والله خاتون..

    وعليكم السلام والرحمه ..

    لا من معرض الكتاب :) من دار النشر نفسها امم اتوقع اتحصلينه بالمكتبات لانه تشكيلة المعرض توزعت باغلبها ..

    اجمعين يارب..

    اي ان شاءالله ومشكوره ع النصيحه..

    اي اهم شي تسمع كلامي خخ ولا اخسف فيه خخخ ..

    خاتون دراسيا انا مقتنع عمليا بع التخرج لا استغفرالله بس ربي بيعوضني ان شاءالله ..

    انتي بعد اتوقع اخر دفعه درست انا اكل :)

    وحياج الله اخيتي..

    ردحذف

دوركم تشخبطون :)