كل عام وانتوا بخير يارب..

السلام عليكم ..

وكل عام وانتوا بخير يارب..

وان شاءالله تكون سنة خير عليكم ..

وفيها انجازات تذكر لانه هالسنه بدعت ماسويت شي بس دورة وغصب بعد خذيتها خخخ..

وبما ان مناسبه حلوه براويكم ككاوي اللي صارلي قرن ادوره وصيت اخوي لما كان ببريطانيا وشافه باكثر من منطقه والمطار وماحصله الحمدالله اليوم لقيته بجمعية الخالديه عاد ماكنت ادوره كنا ادور ماسك الككاو خخخ..

صوره للي ببطنه ..
وهالنوع اول مره اشوفه ..


وهالحجم هم يديد علي خبري فيه الكبير حلو حجمه عشان مامصخها لانه نظامي لما تفك ماحتسك خخخ ..

وبس سلامتكم ..

the princess and the frog+ فوندو

السلام ..

امس اول مره اطلع مع مدمد و اول مره اشوفه بره ربوع الجامعه وعقب سنتين ونص تقريبا :) وان شاءالله مو اخر مره ..

اول شي دشينا السينما لهالفيلم :

the princess and the frog

دعايته :

http://www.youtube.com/watch?v=h6DmEgtibOg

القصة
تدور الاحداث في مدينة نيو اورلينز لحكاية كلاسيكية ملتوية، وهي عن الفتاة الجميلة اسمه تيانا والأمير الضفدع الذي حاول بشتى الطرق من أجل أن يكون إنسان مرة أخرى، قبلة واحدة تقودهم لمغامرة من خلال الرحلات المائية الموسيقية في ولاية لويزيانا.

ملاحظاتي :

1- الفيلم زين بس الازعاج كان وايد فتشتتنا يعني مره مخربطين بكراسي اللي يمنا وعقب ياهل كان يدابج ع الدري يمنا عقب ماوعينا الا طراخ طراخ طراخ مو رمي لاتخافون ولا احد يتسطر خخخ بس الياهل بو سنتين تقريبا غيرنشاطه وقام يركض جدام الشاشه @@

المهم ولما اندمجت ماوعيت الا ايدي غرقت خخ مو بالنهر اللي بالباباي بصولص الفلفل مال الناتشوز اهي اهي خبري فيه كان بحضن اختي ..

2- الفيلم احس مو ليهال وترا مقطع خخخ انا استغربت انه مقطعينه مو لانه عادي عندي هالسوالف قطع اول لا لانه فيلم اولاد عم حطوا العن من هاللقطة @@ بس زين سوو مدام الفيلم كله يهال..

وعقب تمشينا ورحنا ناكل فوندو و الميلك شيك لمدمد ..

وع الطاري اختي تقول انه بلولو هايبر حطوا باسكن وفيه هالفوندو :)

معتوق في بانكوك + ريوقي +شمس الليل لنبيل فاروق

السلام..

رديت للبوستات المزدوجه من كل بستان زهره << شخباري مجلة ماجد :)

اليوم رحت لفيلم معتوق في بانكوك والحمدالله انه التذكره بدينار ونص:p

اللي ما عجبني فيه:

-طارق العلي وايد ماخذ راحته مع هالتايلانديات :\

- الفيلم يبيله بطله اصغر من عمو طارق :p

- مادري شعلاقته بتايلند 2مره يسوي شي فيه عدل !!

- ماكو قصه احس ميمعين جم فكره من افلام قديمه ودامجينها ..(النصب بالسفر- العصابه- الاشخاص متشابهين)

احلى شي في جم موقف بسيط بس يضحكون ..

دعايته :

http://www.youtube.com/watch?v=DD14sVEpdgM&feature=related

_________________________________________________________

ريوقي العاده يكون من كاريبو ..

وهذي جم لقطه لطلباتي منهم ..

سيزر و اخليهم يخلطونها وساعات يحطون فيها خبز وساعات لا..

صمونة تركي ذوقته 3 وعجبتهم :)

هوت شوكلت هاليوم كان احلى هوت شوكلت ذقته عندهم كانت الكريمه وايد ونوعيه الككاو مغيرينها :)


طبعا مو كلهم اطلبهم مره وحده..

وهم اطلب كرواسان جبن مره خذيت ساده كرهت عمري خخخ..

وايام الجامعه كنت اطلب منهم براوني لذيذه وصولص الكاكو سايح ايباااه خخخ ..

وهم عندهم كيك انجلش جنه كان حلو بس من حبيته طلبته جم مره وقطعوه @@

____________________________________________________

هالروايه قريتها من زمان قبل معرض الكتاب ..



اسمها :شمس الليل ..

مؤلفها : د. نبيل فاروق ..

القصه عباره عنمجموعه من الرسائل البريديه من البطله صفاء لصديقتها في مدينتها السابقه تروي فيها تفاصيل حياتها واهم الاحداث التي تمر بها هي حبها لجارها الشاب الكفيف .


وبس سلامتكم :)

بافلوز + امير البحار + crumbs

السلام عليكم..

وكل عام وانتوا بخير يارب..

واجازه سعيده :)

امس الله يسلمكم رحت الافنيوز خخ المهم وكنت ابي هالكافيه و فيلم امير البحار

المنيو :

بطاط مثل فكرة تويستر بس عيبه مكان الكريمه وايد ومكان شويه ..

بس لذيذ هجمنا عليه خخخ..

في كالعاده صوره مختفيه اهي كانت هالمره لسلطة السيزر و عجبتني حموضتها واختي حبت الدياي..

وهذا باستا عيبه ماصخ :\

اختي زادت ملح وعجبها ..

ملحوظه صغيره احنا اللي عندنا عادي عند الناس مالح :)

همبرغه نايس احلى من مالت فرايديز..

وحلينا بهالحلو اسمه شي جذيبافلوز صنداي براوني..

عباره عن براوني ساخنه مع برد فانيليا وفوق عليها كريمه و كاجو وكوكيز وصولص ككاو ..

واكلهم زين وسعرهم رخيص كل هذا ب11 دينار بس,,

والاهم اختي عجبها المطعم :)
***************************************

عقب رحت فيلم امير البحار للهندي كنت ناطرته من العيد وقبل يومين نزل ..

لما شفت دعايته:

http://www.youtube.com/watch?v=ViGKahqSO2w

قلت عسى مايقلد اسماعيل ياسين بالبحريه :\

بس طلع لا..

معلومات عنه من سايت السينما وغريبه ليش ما يحطون اسم المؤلف !!

عموما اهو من تاليف يوسف معاطي ..

القصة
تدور احداث الفيلم حول الطالب أمير الذي يفشل كل عام من التخرج من الكلية البحرية وعن حبه لجارته سلوي(ابنه عميد الكلية)ولكن عند تخرجه من الكليه البحرية بعد ثالثة عشر سنة يأخذ سفينة أبيه الخاصة ويخرج بها في البحر مع امه واخوته وسلوي (التي هربت من حفل خطوبتها) و ينفذ منهم الوقود وبعدها يأتي القراصنة ويخطفوا السفينة ومن عليها ويطالبون بفدية مالية كبيرة. وتدور الاحداث الكوميدية.

جنه كاتبين الفيلم كله خخخ ..

رايي فيه يضحك بس توقعته احلى اخر فيلم للهنيدي رمضان مبروك ابو العلمين حموده كان احلى لانه في رساله وركز على قضيه مهمه اهي التعليم ..

وهذا تحسون احداثه معروفه خصوصا عقب ماقريتوا قصه اللي بسايت السينما :p

**********************************************
وطبعا فترينا شوي في جم محل مسوي تنزيلات بس مانغو كان حايشه زلزال خخخخ..

وقبل لانطلع اختي كانت تبي باسكن فشفت هالكشك ..

وخذيت منه كب كيك ..

عجبتني علبته من داخل في شي يقضب الكيكه عساس تثبت ..

لانه قبل هالمره كنت ماخذه كب كيك من دين اند ديلوكا وكان القوطي كبير لمافتحته باكلها توقعت الكيكه مختربه بس اللي لقيته انه متكوكسه ومسويه وقوف ع الراس وثابته على هالوضعيه..

وهذا النوع اللي خذيته :
red velvet cupcakes

وكالعاده لما نجرب الشغله اكثرمن مره نقارن بينهم :

هذي الكيكه ماعجبتني وايد عيبها ماصخه اما الكريمه حلاها زايد و ناشفه :\

كيكه دين اند ديلوكا حلوه و الكريمه ماصخه بس فيها نقط طعمهم حالي وايد بسهذاحبيتها اكثر من اولى ..

اطالب المطاحن يسون لنا هالنوع :)

وخذيت هذابعد اللي لونها وردي ::

وهذا سايتهم :

http://www.crumbs.com.kw/site/

فيلم ولاد العم + مطعم رايس+ طلقه في الصدر الشمال = جولتي امس

السلام ..

امس رحت فيلم ولاد العم وكنت من زمان ابيه :\

بطولة

كريم عبدالعزيز , منى زكي


النوع

حركي, درامي

مدة الفيلم

125 min



القصة
دور احداث الفيلم حول المخابرات والجاسوسية من خلال أحد ضباط المخابرات المصريين الذين يحاولون استعادة فتاة مصرية، اختطفها جاسوس إسرائيلى بعد أن تزوجته دون أن تعلم هويته.

http://webserver2.kncc.com/arabic_synopsis.php?mv=2834

رايي :

اول شي من العنوان توقعت انهم عيال عم بس واحد مع اسرائيل وال2 مع مصر طلع لا@@

والفيلم عباره عن استخبارات وجواسيس يعني طقني واطقك واحد يكفخ 10 و يطولون يالله يموتون :\

وتوقعته احلى لاني احب تمثيل كريم عبد العزيز ..

وطلعت راسي يعورني :(

دعايته :

http://www.youtube.com/watch?v=I7QOznhUXXE

****************************************************

وبالطريج كنت اقرا هالكتاب ..

وهو عباره عن مجموعة قصصيه كان محورها الاساسي بندقيه ب9 طلقات عاصرت فترة التهدايدات العراقيه (عبد الكريم قاسم)وانتقلت لتستخدم في الغزو العراقي الغاشم (حسبي الله عليهم) .

كل طلقة تمثل بطولة تمت بها سواء من شاب او فتاة او حتى طفل ممن تعرضوا وعاصروا ابشع الجرائم و رفضوا الهروب .

رايي :

حبيتها فكرتها حلوه تمثل فتره صعبه مرت فيها الكويت مستحيل ننساها .

والله يحفظ الكويت يارب..

************************************************

وعقب ماخلص الفيلم رحت صليت عقب تغدينا بمطعم رايس واهو من اختيار اختي لاني انا اللي اخترت الفيلم فالمطعم دورها تختار:)

المقابلات خبز يابس وزبدة ..

هاللقطة الوحيده للديكور ..

كلشي عليه حبات عيش..

والطلب بصينيه انا كان برياني لحم ومعاه دقوس وسلطة الروب واجار ..

واكثر شي حبيته السلطه ..

واخترت مع طبقي لبن اهو يخيرونكم بينه وبين االمشروبات الغازيه ..



طلب اختي مربين والباجي مثلي بس غير فيه غندور صغير اتوقع صبار واهي سلطتها سلطة الملفوف جنه ..



وعقب يابولنا الحلو المهلبيه ماحبها ولا اختي اهي مو ع كيفنا نختاره ع كيف الشيف خخخ..

وكريم كراميل انا احبه بس طعمه كان عادي..

والحلو طولوا فيه عكس العيش بسرعه وصل..

عقب يابولنا قوري جاي انا مو وايد احبه واهو فيه مروره شوي..

رايي بالمطعم زين مو وااو بس فكرتهم حلو بس حلاته احنا نختار الحلو :)

صرت ملكة :p

السلام ..

صرت ملكه وعندي تاج وورد ورصاص :)

كلهم من جايونه مرسي ..

والثمن اجابات ..

اسمك واسم مدونتك؟

رورو الشخبوطة ..

اسماء مدوناتي ...

1- ترندي قيرل ..

2- شخبوطة ..



احب الالوان؟ الايام؟ الارقام؟

اللون الفوشي ..

الايام اي يوم عطله احبه واعتبره عيد بعد :)

الارقام افضل رقم 1..

برجك وتاريخ ميلادك؟


برج الدلو ..

تاريخ ميلادي 11/2/1987

قرب :)باجي شهرين >> نغزه

ماهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

ميزتي اني صريحه وحقانية و صاحبة مبدا وساعات احس اني طيبه خخخ,,

عيوبي فاقده الذاكره و اتنرفز و سلبيه ساعات ..

الصفه اللي اتمناه اكون ايجابيه و ما تنرفز ..


مكانك المفضل؟

بيتنا و اي مكان في يمعه حلو وناسه ..

واول كنت احب دجة القسم..

اي هى هوايتك المفضله؟

القراءه والقرقه الشفويه فيس تو فيس ..


ما المقوله اللى تؤمن بها؟

ليس الفتى من قال كان ابي ** ان الفتى من قال هائنذا.

مابين طرفة عين وانتباهتها *** يغير الله من حالٍ إلى حالِ

تفالؤ الكويت مازالت جميله << د. احمد الربعي <<بنتفائل والله كريم

انما نعامل الناس باخلاقنا لا باخلاقهم..

اجمل هديه قدمت لك من مين؟

اجمل الهدايا اللي تكون مفاجئه وغير متوقعه حتى لو قرطاس:)

اسعد يوم فى حياتك؟ واتعس يوم فى حياتك؟

اي يوم انجز فيه شي يذكر اهو سعيد ..

تعيس يمكن يوم وفاة ديده الله يرحمها يارب بس بنتلقى بالجنه يارب..

موقف طريف لا ينسى من ذاكرتك؟

وايد بس مايحضرني شي الحين..

معاك ثلاث وردات لمين تهديهم ؟

الوردة الأولى لديده و يدي واحمد الربعي << الله يرحمهم يارب

الوردة الثانية لامي

الوردة الثالثة لعائلتي ورفيجاتي واللي يحبوني ..

الورده الرابعه اللي عطتني اياها جاي:p

معاك ثلاث رصاصات على من تطلقهم؟

خخ شسالفتي اليوم مع الرصاص :)

عموما ماحب العنف ولا ايده وافضل الاستفزاز عليه بس الرصاص اذا في مجال يزيل كل من يسوي واسطه ويبديها ع الكفاءه فيستاهلها و يبيلي وايد عيل:(

اي رايك فى الحب؟ ولمن تقول اجمل كلمه حب؟

اه من الحب وسيرة الحب وظلم الحب

الحب مزيج من المشاعر الاحترام والتقدير الوفاء الاخلاص الشوق التضحيه العطاء ..

للي يستاهلها معاني مو رومانصيه ولا من النوع اللي ابوح بمشاعري ولا راعية كلام حلو ..

هل من السهل ان تمثل الحب لشخص يحبك لعدم جرح مشاعره؟

امم اهو لا بس يعتمد انا نادر اللي ماحب ناس بس جذي عبط العاده اكره او بمعنى ادق اتنرفز من موقف او شغله معينه ومجرد مايتعدل الشخص ومايكررالموقف الخايس بكون معاه اروع مايكون فاذا احد قدملي ابسط حقوقي وهي الاحترام بقدمله كل شي ومع العشره بحبه ان شاءالله ..

المراه فى نظر الرجل ।لحظة الحنان ......... أكمل ؟

اعظم كائن


الرجل فى نظر المراه...الآمان ..........أكمل؟

السند ..

ماهو اسعد خبر سمعته هذا العام؟ وماهو اتعس خبر؟

اسعد خبر:انه ولد اخوي طلعوا براطمه علي خخخخ..

اتعس خبر: وفاة ديده الله يرحمه يارب و اي خبر انه في خطيب يرفع ضغطي :\


لمن تهدى التاج؟

مدمد >>made n q8

الوتين - خاتون <<اذاحابين ..

فشه اذا ردت مختفيه :\


مرسي جايونه :)

اضافة : اهداءشريته بس عشان اصوره لج اكيد عندج مثله خخخ..

جولة ع الطاير ..

السلام ..

امس طلعت من الدوام ورحت الافنيوز بس امبيه الطريج زحمه حده :\ المهم وصلت هناك لقيت اختي طبعا انا وياه متفقين مو صدفه رحنا بنحجز بالسينما بس انصدمت الفيلم اللي ابيه 6 متاخر :(

المهم حجزنا فيلم 2 مو بالي ادشه كلش ولا اعرفه اساسا ..

وعقب رحنا كلينا بفرايديز هالمطعم احبه حبا جما و باخر كورس بالجامعه يمكن كل ثلاثاء انا اتغدا فيه ..

وطلبنا كان كله مقابلات هذيل اكثر شي نحبه بفرايدز جربت اغلب الاطباق بس ماحبيتهم مثل هذول ,,

تويستر ..

شوربة بطاط ..


سيزر ..

__________________________________________________________

مامدانا ناكل الا صار وقت الفيلم ..

الا اهو اولد دوغز حجزته و بوزي لي ركبي الا بدش السينما وانسب وقت لنا كان هذا ..

طبعا ركضه رحت اصلي وحتى ماخذينا نفيش لانه كان في قبلنا جم واحد ومع هذا دشينا والفيلم بادي :\

من موقع السينما :

http://webserver2.kncc.com/arabic_synopsis.php?mv=2831

بطولة

John Travolta, Robin Williams

المخرج

Walt Becker

النوع

كوميدي, عائلي

مدة الفيلم

87 min

تصنيف

PG

القصة
صديقين حميمين روبن ويليامز وجون ترافولتا تقلب حياتهما رأسا على عقب عندما تسند لهما مهمة رعاية توائم يبلغا السادسة من العمر وفي نفس الوقت فانهما على وشك توقيع اكبر صفقة تجارية في حياتهما.

هالتوام اهما عيال روبن اللي اسمه بالفيلم دان ..

راي الفيلم احلى من المتوقع دشيته ماده بوزي طلعت شاقه الحلج :)

اي دعايته ..

http://www.youtube.com/watch?v=RhY8AP806tU

***************************************************

وعقب مرينا خذينا برد من قولد ..

انا ماحب الخبيصه اهي اهي ع ابو ابي كورتين وحده الورديه جنه علج وال2 الزرق شعر بنات وبزيد خدود بنات مادري عيوز ماكنت ادري انه بيخلطهم جذي بس ماخليته يكمل الخلط :)

وهذا مال اختي اذكر ككاو ونوع ال2 نسيت اسمه و زادت براوني ,,

بس خدمتهم حلوه واسعارهم احلى ..

__________________________________________________

ولازم خو قصه مع اني هالفتره متنحه مااقرا وايد..

بس مو لانه امس زحمه فمليت وقريت هالروايه اسمها سلمى وتاليف غازي القصيبي ..

النبذه الخلفية :

يرفع الرئيس جمال عبد الناصر رأسه من الاوراق التي تكتظ بها طاولته الصغيرة، في بيته في منشية البكري. يشرق وجهه عندما يرى سلمى واقفة أمامه. يقول ضاحكا: - سلمى‍‍ كيف دخلت؟ لم يشعرني أحد. لم أحس بك. تضحك، بدورها ، وتقول: - سيادة الرئيس! هل نسيت أنني مديرة المخابرات العامة؟!

راي :

امم القصه ذكرتني بسلوى المطيري لانه البطله اغلب الوقت نايمه وتحلم بابطال عقب ماتسمع عنهم شي بالراديو ع سبيل المثال صلاح الدين واحمد شوقي وعبدالوهاب و جمال عبدالناصر وحتى شارون :\

وبس سلامتكم :)

كابتن مصر لـ عمر طاهر + سوالف وذكريات ..

السلام ..

واخيرا انتهيت من قراة كتاب لانني مؤخرا بدأت بتصفح بعض كتبي ورواياتي وقراءة بضع صفحات منها من ثم رميها :(

عموما كتاب اليوم يحمل عنوان (كابتن مصر.. البوم ساخر للمراهقين)

يعد هذا الكتاب ال3 من حيث الاعمال التي تابعتها سواء قراة او مشاهده لمؤلف عمر طاهر ..

وفيه يتناول الكاتب قضايا وظواهر بارزه بحياة كل مراهق باسلوب شيق وبسيط وممتع من خلال 15فصل ..

ولعلل المميز باسلوبه انه مناسب لهذا العصر من حيث الفاظ او التكنولوجيا المطروحه فيه (فيس بوك - شات -نغمات -ايميل ..الخ) بالاضافة للاستخدام المعرب (الكتابه بحروف انجيزيه لكلمات عربيه اكره هالشي :\ والحمدالله كان مقتصر استخدامها ع عناوين الفصول)وملائم للفئة المستهدفه و هي المراهقين .

ال15فصل كالتالي :
1-الجمجمه دي فيها ايه ؟؟

معظم ماطرح فيه اسئلة حول مختلف مجالات الحياة ..

ex:ليه سوبر مان يلبس الاندر وير بتاعه على هدومه من بره؟؟ <<( صج ليش يمكن لانهم ماركه خخخ )

2- تحب تطلع ايه لما تكبر ؟؟
عن اسئلة الكبار للاطفال والخ ..
3-ليه بنكره المذاكرة ؟؟
وفيه تناول تخصيطنا للمذاكره وتطبيق وعوامل التشويش التي تاثر عليها , ثم تطرق لاسباب كره المذاكرة , ومن ثم اشار الى كيف نحب المذاكره ولكي تحدد الاجابه يجب ان تعرف لماذا انت تذاكر ؟؟ ’ واثناء شرحه عرض بعض المواد الدراسيه والهدف الاساسي من تعلمها .
4- ياترى جدي وهو كان طالب كان عامل ازي .؟؟
مقارنه بين الطلبه في السابق والطلبه الان ..

5-ازي تعرف ان الاجازة بدأت ؟
عبارة عن عرض لبعض المواقف ..

6-ليه اكل الشارع احلى من اكل البيت ؟؟
مقارنه بين اكل الشارع = المطاعم واكل المنزل << انتوا شنو تحبون اكثر ؟؟

7-من فضلك علمني الغلاسة ؟؟

اتوقع معنى الغلاسه هي الدم الثقيل , عرض مميزات الغلاسه ومواقف تبين مداها او بالاحرى تبين انك غليس اذا فعلتها خخ..

8-حدث في مثل هذا اليوم (قصص واقعية )
مجموعه من القصص الواقعيه الاطفال ومراهقين ..

9-لو بطلنا نسأل نموت !
مجموعه من التساؤلات لكن هذه المره بشكل عنوان لمقال ثم تفسيرها بمقال امم احببت معظمها مثل سؤال الاصنصير ؟ و المايوه صح ولا غلط ؟ و الحمدالله ع ايه ؟؟


10-من اللي قال البنت زي الولد ؟؟
اسباب ومقارنات تبين الاختلاف بين الجنسين ..

س: لو كنت من الجنس الاخر ماذا كنت ستفعل وهل تعتقد انه حياتك ستتغير ؟ << السوال للبنات والصبيان ..

عن نفسي اي طبعا بتتغير كوني صبي يعني مجالات المختلفه بتكون اسهل متوفره اكثر بدرس برا عادي و فرص الوظيفيه اكثر من واقع تجاربي الوظيفيه انه التفضيل للذكور بس لانه ذكر رغم انه قدراته اقل , ماراح اخاف بطلع بالليل عادي بسوق داري بترتب بروحها اغراض بتصير اقل ماحاتي شبلبس بعرس او عزيمه او عيد او حتى عزا الله يسلم الدشداشه وعموما الولد وايد معطينا حجم اكثر من اللي اهو يستاهله ساعات مو الكل وخاصة اليدات لانه متربين ع انه ريال فهو احسن اما الحين لا احس نوعا ما صار في مساواة بالمشاعر بس لكن الوظيفه وغيره لا للحين احنا مظلومين :\
هم بحب بتزوج اللي احبها طبعا اذا الله سهل ..<< ميزة لنا انه اهو اي لي عندنا مو احنا نروح لهم خخخ ..



11-ليه لما بابا بيقول ان شاءالله بيكون اقصده ان شاءالله لا ؟؟
عباره عن شرح مصطلحات الوالدين ..

12-تحب تكون مشهور ؟؟
اختبار تختار شخصيه مشهور من عدة شخصيات مطروح ثم تتعرف ع شخصيتك من خلالها ,,

13-مين ينفع يكون مثلي الاعلى ؟؟
عرض لقصة بحثه عن مثل احلى بين المشاهير و من حوله ليتعلم انه المثل الاعلى هو من تتعلم منه لا من تقلده فتصبح نسخة مزيفه منه ..
14-ازي تعرف انك مراهق ؟
عرض للمظاهر الفسيلوجيه و البيلوجيه والحياتيه التي تبين انك في مرحلة المراهقة ..

15-هيا كلمة صايع كانت شتيمه زمان ؟
مقارنه للمدلول كلمة صايع بين الماضي والحاضر ثم الختام بنصائح مفيده على سبيل المثال :

1-الصبر هو الحاجة الوحيدة اللي لازم تستعجل وانت بتتعلمها ..
2-اول خطوة للنجاح انك تعرف انت عايز ايه..
3-اوحش حاجة انك تكون مابتعملش حاجة , لانه يبقى صعب تعرف هتخلص امتى ..

ملاحظ الكتاب معظمه باللغة العربيه الفصحى :)
#####################################

ع طاري الدراسه كنت مجهزة جم سالفة ونسيتهم ,,

خل ابلش باختي الصغيره بعاشر يعني 2 ثانوي ومن لما كانت ب8 واهي مجابلتني كل يوم بتدرس شي مره علم نفس مره تقولي عادي ادرس اعلام قلت لها اي قالت ترضين اصير مثلج !! بقلبي حشى ملكي الخاص خخخ ..

ومره بتخصص هندسة كمبيوتر بالمعهد التجاري خخخخخخخخخخخخخخخخخخخخخ ماخبرت هالتخصص موجود فيه امبيه خخخ انا حسبالي بس انا اللي قالت لي عنه بس مره كان عندها مدرسها واسمعها تقول انه بتدش هالتخصص واهو يسيرها يقولها اه بس دبلوم خخ ماكسر بخاطرها ..

ومره دشت المستشفى لما زرناها جان تقولي ابي ادرس تمريض !!

هالفتره هابه انه بتدرس برا لوعت جبدي بهالسالفه وكل يوم سوال غير اليوم تقولي اتفضلين سكن بشقه ولا السكن الجامعي قلت لا اصير هومليس احسن !!

ع طاري طموح اختي ..

حققتوو طموحكم ..؟؟

انا كنت ابي اعلام واستانست اني تخصصته بس عقب لما تخرجت وطحت بجبد نفسي قلت لو داشه تربية رياض اطفال ابرك لي مع انه وع بس دوام اقصر احتكاك باليهال احسن من الكبار و مايبله غني ورقصي خخخ و دوام قريب من بيتنا صج اروح مشي ع قولة ابوي ولي تاخرت اركض :\

والاجازه يابوي 3 اشهر خخ ..

كنت بقول شي ونسيت ..

اختمه لانه مخي قفل ..

تذكرت مادري ميزه ولا عيب اني ادش المدرسه مبجر !! يعني اللي عقبي بسنه خذوا الانجليزي من اول ابتدائي والحاسوب من المتوسطه <<حسب المدرسه انا فلست من الاثنين ..

بالجامعه اللي عقبي زادوا شعب تخصصنا من 2 صاروا 4 !!

لا وينحسب لي اني اكبر منهم مع انه مثل المواليد اهي اهي ..

يعني حتى ميزت اني اخلص تعليمي مبجر طلعت خرطي الا شويه :(