الأحد، ١٣ سبتمبر ٢٠٠٩

انجاز

السلام ..
شلونكم :)
بالبدايه للتوضيح فقط هالبوست مو الدعاية للحملة لاني ماعرف اي شي عنها غير انشودة العفاسي وجم كتيب وماقريتهم ..
البوست عن الانجاز..
بالنسبه لي اعظم شي بالدنيا اهو الانجاز لانه يغير المزاج ويحسسك بوجودك وحتى بعد مماتك بعيد الشر يكون موجود بمثابة البصمة تتركها وتتواجد بجميع الاحوال والاوقات، ونفس الوسام على صدرك اللي تفتخر فيه و ترفع راس اهلك فيه ..
للاسف بعد تخرجي من الجامعه فقدت هالاحساس اول كنت احس فيه لما اشوف انشر لي شي او يبت درجة عاليه بحث او تقرير او برزنتيشن وبيني وبينكم مارضى الا بالاي وحلاته 100% صج حزتها اكيف :)
وهالاحساس راودني بالجامعه بحكم اني كنت ادرس بمجال احبه اما الحين فالحال العكس وهالشي انا سببه وبحاول باذن الله احله ..
الحلو انك لما بتنجز تحس انه وقتك متروس بالخطط والاهداف اللي بتوصلها غرامي التخطيط و عيبي بالتطبيق , ولما وقتك يمتلي ماتكون فاضي لقيل والقال والتوهم والملل والخ ..
والاحلى لما تنجز بشي انت تحب وتطور هواياتك عن نفسي هوايتي مقتصره بشغلات معينه اهي القراءه من لما كنت صغيره و الكتابه مبدائيا توني من اخر سنتين بالجامعه من بلشت مواد الصحافه وقبلها بالعربي مستواي زين بالتعبير والتلخيص والمحادثه الكتابيه هذا اللي اذكره وبس ماكو هوايات 2 !!
دايما يروادني هالسوال واساله اللي حوالي وهالسوال لكم بعد:
شنو هواياتكم والاهم نميتوها والمهم الاهم هل انجزتوا شي ؟؟




كالعاده بوست ع الطاير اللي طرى على بالي كتبته :)

والصوره ماخذتها من هالبلوق :
http://need-for-cooperation.blogspot.com/

شكرا:)

هناك ٢٦ تعليقًا:

  1. كنت كاتب رد شطوله وانمسح كله، انقهر لما يصير جذي..
    بالنسبة لحملة انجاز مادري عنها خير شر عدا الإعلان ونفس الشي بالنسبة لركاز، وعلى الرغم من انا الحملات هذا هدفها التوعية ومشكورين من يقوم عليها لكني مو قاعد أشوفها قاعدة تأثر على نسبة كبيرة من الشباب..


    بالنسبة لسؤالج شنو اللي انجزناه، اعتقد انجزت وايد كشاب في فترة المراهقة، والصراحة هالتجربة كانت قصيرة نوعًا ما لكنها خلتني أعرف أمور وايد لكن للأسف كل شي انتهى. كنت صحافي في مجلة اسمها " كويت سيركل " هالمجلة كانت على النت لكنها بعدين صارت مجلة ذات اوراق وتنشر في الاسواق.. عجبه صاحب المجلة بشغلي وصرت بفترة سريعة مدير التحرير.. كانت تجربة يديدة علي عرفت أمور عمري ما كنت أعرفها، عرفت ان المجلة اللي تقراها الناس بنص ساعة نقعد عليها اسبوع شغل وعرفت ان طبيعة الورقة ممكن تأثر على شعبية المجلة لأن في أوراق جودتها رديئة. ولما صرت مدير تحرير كنت اتابع شغل المحررين وكل هذا بدون أي أجر مادي، والمجلة كانت توزع مجاني في فيرجن وبعض الكافيهات وغير جامعة الكويت. بعد مدة تدهورت أمور المجلة واعتذرت من صاحبها لأن صارلها فترة طويلة ما نزلت عدد يديد، وماقدر انطر التأجيلات.. واعتب هالشي انجاز لي على المستوى الشخصي ويضاف لرصيدي، اما حاليًا ما افكر أبدًا ادخل مجلة او جريدة، وأحس نفسي اكتفيت مادري يمكن احس إني مليت او اقتنعت بالفترة اللي قعدت فيها بالمجلة..

    أما عن الهوايات، ف ما أعتقد نميت منها شي لأن هواياتي مافيها شي يستحق التنمية فهي عادية:

    الركض
    السينما
    القراءة >> اشوف نفسي قارئ بصورة مقبولة الى حد ما لأن عندي أنواع معينة من الكتب اقراها أما غيرها تحسسني بالملل وما اقدر اقرا منها صفحة وحدة..
    احب روايات الرعب والغموص والجرائم وشوي من الروايات الرومنسية..


    تسلمين ع التوبيك

    ردحذف
  2. هلا اخوي طماشه..

    وي حسافه بس ان شاءالله قدرت تعيد المهم منه وايد تصير فين هالحركه من جذي كثر ماقدر اسوي لتعليق كوبي قبل لا انشره احتياط..

    اي بخصوص الحمله ماحس انه انجزوا المطلوب بالنسبه لي احس يبيله يقون حملتهم الاعلاميه اهي كانت اذا ماخب ظني مجرد ندوات بالمجمعات وكتيبات يوزوعنها جنه مع الجرايد و اعلانات بسيطه ..

    ان احس كحملة اسمها وهدفها قوي حلاته يسون نفس ورشات العمل ويتبنون الموهوبين ويطورون مواهبهم ..

    ماشاءالله خوش انجاز وايد حلو و يضيف الى رصيدك المهني وبفيدك بالمستقبل ان شاءالله..

    صاج العمل الصحفي متعب ويبي وقت بس هالتعب يكون انتاج جيد ومتعوب عليه بيحس فيه القارئ و بنفس الوقت من خلال مناقشاتي مع البنات حسيت يهتمون بشكل وجودة الورق وخاصة بالكتب ان بالنسبه لي المضمون اهم بس جودة الورق مهمه في حالة النسخ اللي بتحتفظ فيها اين كان الشي مجله كتاب او حتى دفتر مدرسه ..

    بس حلو مادري عن نفسي اشجعك انك تستمر بهالمجال خصوصا اني قريت لك وايد شغلات ونوعا ماعرفت اسلوبك سواء بالنقاش او الكتابه فاحس انه قلمك هادف اسلوبك ماشاءالله محترم تقدر تفيد المجتمع والكويت ..

    اهي عاديه بس متنوعه ماشاءالله ..

    الركض تقدر تنمي بالمشاركة بالمسابقات الجري وغيره وبجذي تكون تنجز فيه ان شاءالله ..

    ان احب اتعلم من كل شي فالسينما اعتبره مجال للتلم من تجارب واخطاء الاخرين سواء من ناحيه فنيه كتصوير واخراج ومنتاج والخ او من ناحيه فكريه حوار و قصه والخ ..

    القراءه بالنسبه لي شي 2 الخوض بعالم 2 ذكرتني ان شاءالله بنزل بوست عنها..

    تقريبا مثل ذوقي بالقراءه وحاليا شاريه كتب تنميه ذات و بلشت فيه بس خليتهم عشان رمضان ..

    وفي رواية رعب حلوه اذا حاب تقراها اسمها حظك اليوم لاحمد توفيق نزلت بوست عنها وقريتها انا و2 من خواتي و زميلتي وكلنا حبينها من النوع اللي اذا فتحتها ماتقدر تسكرها من كثر ماهي حلوه وتشد ..

    والجرائم احب تختخ وربعه المغامرين ال5 وجربت اجاثا كريستي ووصلت لي الثلث الاخير جان استوعب انه القصه مجموعه قصصيه مو روايه متصله خخ وماقريت لها شي 2 حرمت..

    ماطول عليك اغلب قرائتي هالسنه موجودين هني..

    والله يسلمك يارب..

    مشكور ع التعليق ..

    وحياك الله..

    ردحذف
  3. اذا عيل باخذ جولة في بولقج وبشوف المواضيع القديمة، اما عن رواية " حظك اليوم " قريتها وعجبتني واحمد توفيق ماشالله عليه أسلوبه حلو ويشد وقريتله بعد
    " غرفة 207 " وهي عبارة غرفة في فندق مسكونة بس جد تعيشين معاها أجواء.. لكني الصراحة الكاتب الاول لي في مجال الرعب والغموض هو (عبدالوهاب السيد ) اهو اللي خلاني اقرا واحب القراءة.. يمكن ما احب كتبه العلمية مثل " خلف أسوار العلم " لانها معلومات وانا كتب المعلومات مو ذاك الزود معاها..

    اما بالنسبة لروايات الغموض والرعب " الاجنبية " ف القى صعوبة في فهمها، لانها لما تترجم الى اللغة العربية تكون المفردات مو واضحة وهالشي مادري شلون صاير.. صح اني تخصص لغة عربية وماعندي مشكلة بمعاني كلمات لكن الغلط انه لما تترجم بعض القصص من الانجليزي للعربي ما توصل فكرة النص بالضبط للقارئ.. خذيت رواية حق أغاثا ورواية ثانية حق كاتب ما اذكر اسمه وكلهم اجانب.. حاولت اني اتعمق واقرا بس ماقدرت سكرتهم ولا وأفكر اقراهم.. مع ان عناوينهم تشد بس لما ابدا اقرا اقعد افكر بكل صفحة شنو المقصود.. علشان جذي قررت أكتفي بالروايات العربية..

    بالنسبة للسينما، عاد تصدقين وانا أقرا كلامج تذكرت شي بخصوص الانجاز لان احب وايد اعطي رايي بالأفلام عقب من أشوفها واحب أفصصه من بدايته لحد نهايته لول
    وكدليل على ذلك في موقع تقييم مدرسين جامعة الكويت وهالموقع فيه مساحة للأفلام الي تنزل بسينما الكويت ويحطون لنا بوكس نكتب فيه الكومنت مالنا مع جم نجمة.. عاد انا فترة يت كنت اقول رايي بأي فلم ادخله
    وهذا جم لنك من الانتقادات لبعض الأفلام الي رحتلها..


    http://kuniv.net/index.php?p=19&mid=159

    http://kuniv.net/index.php?p=19&mid=25

    http://kuniv.net/index.php?p=19&mid=35

    ( في كومنتات وايد، أطول كومنت هو ردي :D )

    ردحذف
  4. هلا اخوي طماشه ..

    ولكم باك..

    ان شاءالله تستفيد من هالجولة ..

    اي قريتها 207 بس مو بمستوى حظك اليوم انت شرايك اي احلى؟؟

    د. احمد ماشاءالله اسلوبه عجيب قريت له اغلب اصداراته وتوني مبلشه بسلاسله ..

    عبدالوهاب السيد ماقريت له شي ورقي او بمعنى ادق كتاب صجي ماقريت له الا بالنت ومن زمان وشريت له ابعاد مجهوله جزئين بس ماقريتهم لي الحين ..

    واي صاج بخصوص الكتب هذي خلف اسوار العلم - حدث بالكويت - هادم الاساطير وغيره معلوماتهم حلو بس سرد جامد جنه مناهج المدرسه ..

    وهم اوفقك الراي بخصوص الكتب المترجمه اغلبها ياترجمه ركيكيه او احس مو شي سهل تحول الكلمه من لغة لي 2 ناقل نفس المعنى والاحساس اللي موجود باللغه الاصليه ..

    اما بالنسبة الاجاثا كريستي يقولون في طبعات معتمده اهي نسخ اصليه مترجمه بدقه دون اضافات او حذف بس عن نفسي ماقريتها ..

    اي مثلي انتي الكوبي مالي بس ع صبي :)

    حتى انا احب اكتب عن الافلام اللي شفتها وتوني هابه بالافلام بالبيت ومن قبل بالسينما ..
    اي لازم تفصفصه عساس تعطي حكم اكيد ..

    اي علقت جنه فيه على فيلم بس الاغلب اعلق على دكاتره ..

    مشكور ع الروابط..

    الفيلم الاول حلوه قصته بس ابي مقطع حلاته رحت له بالسينما ..

    كركر امم نسيت اسمه الممثل بس ماعمري شفت له شي مايشدني تمثيله و اكبر عيب بالسينما المصريه لحديثه التنكيت القليل الادب ..

    وعمر وسلمى شفت الجزئين الاول احلى من ال2 وجنه جرعة قلت الادب تضاعفت بال2 اكثر ..

    حياك الله اخوي..

    ردحذف
  5. هلا رورو..

    احمد توفيق خذيت له " الان نفتح الصندوق " قريت منه جم صفحة بعدين هديته ما شدني اقراله.. ومن فترة شفت له نفس الرواية الجزء الثاني بس لحد الحين مو متحمس اقراه..

    بالنسبة ل حظك اليوم أو غرفة 207 ، مادري انا حبيت 207 أكثر يمكن لان احداثها غامضة لكن هم حظك اليوم ما تشكي من شي..

    رورو من صجج عندج الابعاد المجهولة ومو قاريتهم؟ جد جد احسدج قولي ليش؟ لأني اتمنى اني مو قاريهم وارد أقراهم من يد ويديد، والله العظيم وهذا انا صايم كاهو كتاب " الابعاد المجهولة 1 " يمي وهذي ثاني مرة اقراه من كثر ما اهو حلو.. الجزء الأول وايد وايد حلو اما الثاني حلو لكن مو نفس الأول.. الاول فيه 4 قصص اما الثاني قصتين.. ضروري تقرين الابعاد المجهولة صج تعيشين جو غير.. جان زين ادش داخل ذاكرتي واشيل جانب قرايتي للقصة علشان ارد اقراها واتحمس نفس الحماس الأول.. :d

    لول ضحكتني سالفة الكوبي بس على اصبي خخخ

    وتسلمين اطلاعج ع الروابط.. وايد افلام كانوا بس انا اخترت عشوائي..

    بانتظار يديدج على البلوق..

    ردحذف
  6. اهلين ..

    اي صح مو وايد حلو بس في افكار حلوه وفي قصه ماذكر شسمه حلو انه تبين لك اختلاف الاسلوب واللغه اللعربيه وتطورها باختلاف الازمنه الان نفتح الصندوق قريت الاول بس مانزلت بوست عنه وشريت ال2 بس مابلشت فيه توني ..

    207 زينه فكرته غريبه بس فيها شغلات ماقدرت استوعبها ميته تتمشى ولابسه تسوس !! بس ضحكتني هوشة شجرة الدر و وكيلوبترا جنه ..

    وحظك اليوم خرعتني اكثر ..

    لا مو ماقاريتهم كلش قريت جزء منها مثل ماقالت لك بالنت وكان اسمها مذكرات مراهق كويتي شي جذي وانا من النوع اللي ماحب اقرا الشغله اكثر من مره بلشت فيها حسيت بملل التكرار جنه ادرس للفاينل :)

    اهو عن الويجا واللي يحضر ارواح وماعنده ربع والخ ..

    اي اهو حلو مااخالفك رايي بس مشكلتي اني قريت جزء منه قبل ودي اعرف وين وصلت عساس اكمل منه مابي اقرا من اول والاغلب جذي ال1 يكون احلى من 2 ..

    اها اهو مجموعة قصصيه حسبالي قصه وحده بس ..

    مشكور على التوضيح..

    اي لاحظت في نقاط تشابهه وايد بينا بس بلشت تطلع الفروقات :)

    الله يسلمك يارب اي كنت بشوف اذا لك بعد بس ماقدرت..

    ان شاءالله قريب ..

    مشكور على النقاش ..

    وحياك الله..

    ردحذف
  7. الله يحييج أختي، وبالنسبة ل الأبعاد المجهولة حبيت اوضح
    انها مجموعة قصص واحداث ل شاب كويتي تصيرله أشياء غريبة وعلى حسب ما فهمت من كلامج انج قريتي

    " بداية لابد منها " اللي تكون باول الرواية وهي تعريف الشاب نفسه وعمره ومنو معاه ومن هالكلام

    وقريتي شوي من " قشعريرة " اللي تتكلم عن لوحة ويجا
    بس هم أشجعج تقرينه على من يديد راح تحسين بطعم الرواية أكثر..


    طماشة

    ردحذف
  8. هلا اخوي ..

    ان شاءالله لي خلصت الكتابين اللي بلشت فيهم اقراه ..

    مشكور ..

    ردحذف
  9. أنا ودي أكتب رواية

    بالأصح روايتين

    عندي القصص اللي أبيها بس الطريقة و شلون ما أعرف بس صج هدف حياتي أكتب هالكتابيين

    :(((

    ردحذف
  10. هلا موم..

    حلو ماشاءالله..

    امم شوفي رابطة الادباء اتوقع بيفيدونج ان شاءالله ..

    وهوايتج الوحيد التاليف ؟؟ ماكو هوايه نميتيها وانجزتي فيها ؟؟

    وحياج الله اختي..

    وموفقه يارب..

    ردحذف
  11. إمبله أنا هوايتي أيمع كتب الرعب والخيال العلمي وأي شي مزعج ما أعرف أقرا إلا هذول الثلاث.. ما أقراهم بسرعة بس أشتري دايما كتب ولا ما أعرف أحس أستخف إذا ما شريت شي

    و هوايتي اليديدة الثانية همن تيمع التراجي والمجوهرات الأنتييك توني هبيت فيها جم يوم

    ردحذف
  12. رابطة الأدباء وين صايره و متى تبطل؟؟

    أي و ما تدرين معرض الكتاب هالسنة متى؟ ;)

    ردحذف
  13. ولكم باك موم..

    اي حلوين هالنوعيه احبها تشويق واثاره ومتعه ..

    اي مثل حالتي شكثر كودت عاد بمسك عمري لي معرض الكتاب ان شاءالله..

    اهي بالعديليه ورا نادي كاظمة و جبال كببجي جنه و و بنك ..

    برمضان مادري متى تبطل بس اول قالولي كل اثنين الساعه 7 للادباء اليدد تبين اتاكد لج اعرف وحده معاهم وايب لج منها اللي تبين انتي قوليلي بالضبط شنو وانا اسالها لج ان شاءالله ..

    ومعرض الكتب خبري فيه انه باخر 10 بس خل اتاكد لج ..

    ردحذف
  14. اي طلع صح المعرض


    معرض الكتاب العربي الثالث والثلاثون التاريخ:28/10-7/11/2009 الصالة:5-6-7

    المصدر..
    http://www.ksclub.org/vb/showthread.php?t=19250

    ونسيت اعلق ع هوايتج ال2 حلو ماشاءالله شوقتيني اشوف مجموعتج :)

    بالعافيه يارب..

    ردحذف
  15. مشكورة حبيبتي :*
    إنشالله راح أجيك عليهم

    و معرض الكتاب حاسه راح نتلاقى أنا معاج صوب مكتبة دايموند بوكس! أنا معاج بالضبط نفس الإهتمامات

    جم كتاب عندج لحد الحين؟

    قريتي مزرعة الحيوان مالت جورج أورويل؟ هذا أحلى كتاب عندي بالدنيا و لو مهما أشتري و أقرا ولا شي راح يقايشه

    والمجموعة مالت المجوهرات توني بديت فيها بس الكتب أقوى بوايد

    ردحذف
  16. هلا موم..

    العفو ولو حياج الله..

    ان شاءالله وموفقه يارب..

    خخ اذا شفتي وحده واختها يتناقشون وعادي تلف وتسولف معاج ترا هذي انا ..

    ودي اعرف شنو بتنزل دايموند بوك خبري فيهم قبل جم شهر سايتهم اخترب ..

    مو قاريته ولا قاريته ولا اللي من دايموند بوك؟؟

    رحت حسبت لج ع طاير..

    اللي بدرجي ..

    26 كتاب قريته ..

    جريب ال20 مو قاريتهم ..

    وعندي من الظمني وايد ..

    عندي سلسلة ماوراء الطبيعه بس قريت 12 عدد منها وباجي 65..

    وفانتازيا تقريبا نصها قريت منها حوالي 5 اعداد وباجي اقل من ال20 تقريبا..

    وعندي 8 من صرخة رعب قريت 2 بس ..

    وعندي روايات عالميه يمكن 7 قريت 1..

    وعندي فلاش وسماش بس هذيل اذا مالي خلق اقرا ..

    بيصيرلي شهر وشي مو مخلصه ولا كتاب :(

    لا والله انا ماقرا انجليزي وايد ولا مترجم بس اذا حلوه ومترجمه اقراها ليش لا .

    حطيتي لسته ولا تحبين تشترين بدونها ؟؟

    انا احط بس مالتزم فيها :(

    اي الكتب غير والمجوهرات يبيله مقاقه وتفرفر وميزانيه ..

    حياج الله خيتو..

    ردحذف
  17. أمبيه رورو تصدقين كتبت لج كومينت شطوووله بس مادري وينه :(

    كنت مو شابكه من اليوزر نيم مالي يعني كتبتها بعدين حطيت الباسورد والإيميل و شكلي بس شفتها ما حطيت أوكي جان تروح :((((((

    ردحذف
  18. فانتازيا و ما وراء الطبيعة بس تنباع بالظمني؟؟ شرايج فيه رعب رعب ولا عادي؟

    صرخة الرعب أنا عندي تقريبا كل الأجزاء بس ما قريتهم لأني قريت جم وحده و غثني أسلوب الكاتب صفحتين بس و أهوا يصارخ و ما يعرف يعبر

    كلش ماكو لستة أنا لستتي دايموند بوكس كلهم!! أبي كتب م. عبدالوهاب السيد لأنه ماشالله كتبه مخلصه من كل مكان!

    و مزرعة الحيوان أنصج فيها وايد!! من أحلى الكتب اللي عندي و قريتها و مرت علي و اللي راح تمر علي لي هالدرجة أدري الإسم يمكن عبالج قصة يهال و سخافة بس إهيا لأ كلها عن النظام الشيوعي وأشياء سياسية إهيا عن حيوانات يقلبون على راعي المزرعة أنا شريتها من جرير بس من زمان مخلصه ما أشوفها

    ردحذف
  19. أزال المؤلف هذا التعليق.

    ردحذف
  20. رورو مكتب البريد اللي بالكويت ما تدرين إذا عادي نطلب كتب أو أي شي ثانيه ولا لازم بس رسايل؟؟

    في سايت نيل و فرات فيه كتب و مكتوب دولة الكويت و بالعنوان مكتوب الصندوق و الرمز البريدي تهقين صج؟

    مو معقوله بطلبه و أقول لهم يودونه أمريكا حق صندوقي مال أراميكس بعدين إيي أهنيه قويه

    ؟

    ردحذف
  21. اتصدقين ماعندي هوايات معينه

    بس الحين هابه بالقراءه

    بقت من اختي جم روايه وبلشت في وحده اسمها زئبق وخلصتها وببلش في اعترافات غايشا

    عبدالوهاب السيد عند اختي كتابه 17 بس ليلحين ماطليت عليه

    امممممم وعلى طاري الانجاز ماحس اني انجزت شي يذكر! وهواياتي على حسب المزاج .. بس ما نميتها .. مره هبيت ارسم على الحرير .. بس وقفت هالشي .. وكنت ابي ادش دورة تصوير وهونت على اخر شي
    المزاج يتحكم فينا :)

    ردحذف
  22. هلا موم ..

    حسافه :(

    عاد انا حلمانه بهالبوست خخ ماكو شغل ..

    اشوه قريت ردج ولا جان سويت نفس الحركه ..

    وبالنسبة لماوراء الطبيعه وفانتازيا انا خذيتهم من الظمني بس رفيجتي حصلتهم بالعجيري بس عقب بنت راحت تقول ماحصلت وايد اعداد فيها ..

    ماوراء الطبيعه في وايد اعداد تشوق من اللي قريتهم ..

    مثل سحر النداهة و اكل لحوم البشر ..

    بعدين اللي عن ليبيا نسيت شسمه و الموتى الاحياء..

    والي عن التوام..

    اهو شنو طريقته يتناول الظواهر الغريبه ويكتب عنها قصه ساعات تكون رعب ع الخفيف وساعات تشويق مو طبيعي ..

    والظواهر مو شرط تكون رعب لا عادي مثل سالفة التوام وغيرهم كانت مبنيه ع ظاهر نفسيه وشغلات جذي بس ساعات بحبكتها رعب ..

    جني دوختج :)

    اما فانتازيا لا غير اهو انه بنت تحب تقرا مثلنا وخيالها واسع تعرفت ع واحد عنده جهاز اسمه صانع الاحلام وعقب تزوجها هالجهاز مثل كمبيوتر وسماعات تلبسهم وتحلم بعالم فانتازيا هناك تصادف كل من سوالف الباباي مث بطوطه او علماء مثل فرويد او رئيس مثل تشي او ادباء مثل شكسبير والخ وتقابلهم وتصير وحده منهم ونعرف الشخصيات بشكل 2 بس ممتع..

    وطبعا مو كلهم حلوين لا مبدائيا ع حسب الشخصيه..

    وصرخة رعب انا قريت 2 منها مثل ماقلت لج وحده عجبتني وال2 عادي بنزل عنهم بوست عقب ان شاءالله..

    اللي قريتهم اماني مرعبه وكانت عاديه و ال2 الصديق الخفي احلى من الاولى بس مو توب ..

    شفتيهم بفيرجن اذا موجودين او لا ؟؟ لانه كل اشوفهم ..

    انا خاطري باصدارات دار ليلى اهي مثل دايموند بوك ومعاها بس مايبون اصدارتها بالكويت ابي يوتيبا و 7 وجوه للحب..

    لا عادي ماحسيتها انها قصة يهال خخ خو العنوان مو مقياس لانه عندي ملوت ماوراء الطبيعه والخ شكلهم ملوت يهال بس المحتوى لا ..

    اللي صج قريتها وحسيتها لليهال رجفة خوف ..

    بس بدور مزرعة الحيوان بمعرض الكتاب ان شاءالله..

    وترا ماخرعتني ولا قصه الا حظك اليوم لانه وانتي بكرامه دشيت الحمام والليت محترق جان تبدي التهيئات احس بتطلع لي ايد من البالوعه او عقارب من الزاويه خخ..

    مشكوره..

    ردحذف
  23. اتوقع اي مو في شي اسمه الطرد :)

    وكل يقولون البريد الحكومي مو اهو ماغيره جم مره اقرا انه يوصلون فيه اغراض وايد..

    نيل والفرات يقولون انه شحنه غالي بس تاكدي ..

    انزين ليش ماتنطرين عقب المعرض تطلبين تاكدي مو موجودين عقب طلبيهم..

    تبين اي كتاب في وايد كتب يقولون ممنوعه مو بالكويت وحصلتها عادي ..

    اي اتخيل عاد ارميكس يسونها خخ..

    وحياج الله..

    ردحذف
  24. هلا فشه ..

    عادي مثلي غصب طلعت لي هوايه خخ..


    انا اقول وينها غاطه اثر عديناج تقرين :)

    شرايج باعترافات غيشا حلو ولا ؟؟

    والزئبق عربيه ولا ؟؟

    وايد ماشاءالله يمدحونه السيد ..

    عاد ماشاءالله هواياتج حلوه حاولي تنمينها ..

    اي صاجه هذا عيب من عيوبنا..

    مشكوره خيتو..

    ردحذف
  25. الزئبق روايه مترجمه عربي

    وغيشا ليلحين توني بالصفحه 16 :) بس شدتني
    عاد ودي اشوف الفلم :>

    اي عاديتوني من كثر مايبتوا طاري القراءه :)

    احاول ان شاءالله ارد حق هواياتي القديمه :)

    عيدج مبارك حبيبتي وكل عام وانتي بخير يارب :*

    ردحذف
  26. هلا فيشه..

    اها مرسو..

    اي يمدحونها وانا شفت دعايته باليوتيوب..

    هذي اهي اذا حابه تشوفينها..

    http://www.youtube.com/watch?v=CB67V6Tpm1c

    خخ بس شي حلو ممتع ..

    ان شاءالله ..

    ايامج سعيده وانتي بخير وصحه وسلامه يارب..

    حياج الله اخيتي..

    ردحذف

دوركم تشخبطون :)