الأربعاء، ١٢ أغسطس ٢٠٠٩

عشقي للصحافة .. ودراستي وعملي ..


السلام..



اللي يعرفني يدري اني خريجة اعلام وتحديدا صحافه هالتخصص اللي الدكاتره قالوا لنا انه اسكت وانه مرغوب وانا توقعت لي تخرجت بيصير طق عصي علي وانا قول نو بردو مابريد وي قصدي لا مابي واااي ياشين التلزق طلع تخصص خرطي محد يبينا ماقبلنا الا الديوان لانه كويتيه ومعدل..

والحين 10 اشهر شغل كرهة عمري من سبت الدوام حاولت اطلع ماكو وين اروح هم انا الحين كبيره 22 سنه لازم اعتمد على نفسي ويكون عندي استغلال مالي ..

يت لي فتره شفت اعلان الحيد بو كوكو تبع القبس وانهم يبون محررين طرشت له ايميل ولا عقب انباق ايميله خخ قلت خيره الله مايبني اشتغل وارد للصحافه وهم انخطبت بس ماصار نصيب وهونت عنها ..

بتقول يع شلج تخصصج بايخ..

بقولك القلب ومايهوى :)

الصحافه متعه ومافيها روتين و تاثر وتقدر توصل صوتك للناس وهم تقدر تسوي شي لانه القلم يعتبر سلاح كل اللي كنت بسويه للاعلام كتبته قبل لا تخرج بمقالة التخرج ترا صج مو لانه عليها 10 درجات ..

هم اهي سلطة رابعه ..
جربت كونا بس من اول ماقدمت ويقولون لي بدون واسطة ماراح تمشين و اهما اوردي مختارين اللي يبون و عطونا امتحان يبجي ولا شي له شغل بالاعلام كل معلومات عامه وغبيه خخ من مال البنك الامريكي وانا شدراني انا بنوك الكويت ماعرف منو لا والحين اقرا اقتصاد مو لاني بزبز ومن لا والله مجبوره ..


بس عيبها شنو؟؟

نظرة المجتمع السلبيه للصحفيه في واحد كنا رايحين نقابله واحنا سنه 3 جامعه اهو مركز ودين وهم بنت كانت اعلام سالنا اذا بنشتغل صحفيات قلنا لا جان يقول بما معنى احسن لانه شارع الموبقات اهو شارع الصحافه شدعوه !!
وهم متعبه وايد محسوبتكم تعودت ع الرباده اهي اهي..

صج مليت وودي انجز واحس ماراح انجز الا بهالمجال (الاعلام)خصوصا انه ماكو ماستر ولا دكتوراه اهي اهي ..

عندي فلوس بس ابيه ع حساب الحكومه اتشرط ابي احس بفايده اني كويتيه عادي دزوني واردهم عقب بس فلوسي اللي يمعتهم ماتكفي جني غيرت الموضوع المهم ..
بتقولون شالمطلوب بقولكم ..

1-حبيت افضفض :(
2- لو مكاني شتسون غير انكم تنتحرون خخ لا بعيد الشر ؟؟

سوري فشه مخي مقفل حاولت اكتب عن افلام امس ماقدرت :(

هناك ٢٤ تعليقًا:

  1. واايد نفسج يعانون من هالمشكلة
    صج طلبة الكويت واايد ضاغطين عليهم
    والاعلاميات على وجه التحديد دايما المجتمع ينظر لهم بنظرة دونية مادري شكوووووووووو

    انا قبل لا اتزوج قبلوني بتلفزيون الوطن
    لا تشوفين شكثر حبطوني من الموضوع ليين خلوني ابطل اشتغل بمجالي
    الله يسامح الي كان السبب :((

    ردحذف
  2. هلا فانتازيا..

    اي صح مو بس انا حتى رفيجاتي جذي..

    اي بس بدون فايده لو بتحجى عن قسمنا اشوه انه متخرجه ولا جان فصلوني خخ..

    مو لانه الخير يخص والشر يعم لانه منهم سطحيات و ماهم الا شكلهم ولا الدلع ويبالغون باللبس والحركات ..

    بس في منهم قمة الاخلاق بس شنسوي :(

    وي طلعتي زميله..

    اي حلو انا ودي اصير معده بس ماكو تلفزيونات الراي يقولون مايبون كويتين و الوطن مااحبه قبل كنت اموت ع هالقناة بس عقب ماعرفت وتعمقت بالسياسه كشيت منها وتلفزيون الكويت اسمحيلي اتوقع لي سويت شي مو بس ماكو امكانيات يمكن حتى امي ماتابعني خخخ..

    مشكوره اختي ع المرور والمؤازره..

    ردحذف
  3. وااااااااااااي .. كتبت رد اشطوله وراح...

    لي رجعة..

    بس لا تنحبطين فديتج...


    راجعة لج ارفع معنوياتج...

    ردحذف
  4. هلا بخ بخ..

    بعد عمري مرسو..

    ناطرتج..

    ومشكوره خيتو..

    ردحذف
  5. اسم الله عليك رورو هذي عين وما صلت على النبي ..
    تعوذي من الوسواس الخناس وقضبي مينونك (دوامك ) .. والصحافه مارسيها هوايه يعني سوي مقالات ودزيها حق المجلات او الصحف .. في بعض الوزارات عندهم علاقات عامة او ادارة الضيافه يسوون مجله داخليه او اصدار الهيئة العامة للثقافه عندها اصدارات ليش ما تروحين لهم وتشغتلين في هذي الاصدارات ؟؟

    ردحذف
  6. حتى انا ودي اكمل دراستي برة :(
    بس الظروف آآخ عالظروف
    يالله الحمدلله على كل حال

    ردحذف
  7. هلا ليزي..

    خخ تهقين عين اهو ميزه الوحيده فيني اني تخرجت قبل اللي كبري من اهلنا سواء بالعمر ولاالدفعه..

    اي انا قلت ماراح اخليه الشكوى لله الا اذا لقيت بديل بس نفسيا انا مو مرتاح كلش ..

    ونفسيتي ساعات تاثر ع صحتي :(

    اي انا اشتغل بهالمجال و الحكومه شغله بايخ وملل وماكو امكانيات وفي ناس تحن حسبالها احنا الات ..

    وين صايره الهيئة العامه للثقافه؟؟

    ومشكوره وجزاج الله خير خيتو..

    ردحذف
  8. هلا سي..

    الله يسهل وتكملين يارب..

    انا تخصصي مو موجود اهني ولا يدزونا له بعث برا لا الجامعه ولا التطبيقي:(

    موفقه يارب..

    وحياج الله..

    ردحذف
  9. هلا رورو

    هذا حالنا كلنا انا صارلي شهرين متخرجة قسم علوم سياسيه وقاعده انطر الديوان ما قدمت ليلحين وحدي متحبطه قبل ما اقدم كل الي قدموا قبلي قبلوهم بالوزارات الي طايحة بجبدهم مثل الصحة التربية الداخلية احنا شكو بالصحه

    يالله الله كريم هذا حالنا كلنا اذا عندج واسطه بتشتغلين بالمكان الي تبينه وبسرعه بتطيرين فوق واذا ما عندج بتمين طول عمرج تزحفين

    الكويت للأسف صارت ديره احبااااااااااااااااااط


    مشكووووره :)

    ردحذف
  10. هلا شيونه..

    المصيبه انه عشمونا ليش يقصون علينا !!

    اي الديوان هذا الوزارات اللي فيه زيدي التجاره والعدل والاوقاف اما الماليه والخارجيه يبيلهم واسطات !!

    اي واسطتنا الله والله كريم وبيفرجها علينا يارب..

    حده مادري اهاجر خخ ..

    العفو ولو..

    حياج الله..

    ردحذف
  11. وي شنو... تجمع المحبطين...

    لا شنو هذا... عيل لو تشوفون اللي عايشته كل يوم شنو يصير فيكم...

    الحياة تمشي يا جماعة... لا تفقدون الامل...

    رورو..اول ما تخرجت ومعدل حلو..مو واو... بس حل..قدمت بالنفط..وبواسطة لكن بيوم الاختبار..ما عجبت الاخ... ماانقبلت...

    وقولة واحد من خطابي...لما سألني عن شهادتي ومستواي..

    المرة مردها البيت... يعني كل هالحجي..خربووووتة...


    رورو.. القطاع الخاص يبيله شوية ترزز يكدووون واذا حبوج ارفعوووج.. والحكومة..ماعندهم هالتطور...


    جربتي تروحين زين ولا فيفا؟؟؟؟

    ردحذف
  12. هلا بخ بخ..

    خخ شفتي شلون يقلبنها نكد كل وحده طلع اللي فيها يكفيها ..

    الله يعينا يارب..

    انا قدمت للنفط بعد وهروني بالامتحانات 3 امتحانات والساعه 8 وبالاحمدي وانتي تعرفين بيتنا وين يعني كل يوم اروح اشبر الكويت من الشمال لي الجنوب ومقابله باول يوم برمضان نشوفوا ريجي واهو انا مقدمة عندهم الا لما قالولي الا معدلهم 3 ونص ينقبلون طلع خرطي ..

    وهم لاحظت اغلب الاماكن يبون صبيان انزبن ليش شهالظلم احنا مو تخصصنا يبيلها شغلات صعبه لا شغلات اقدر اسويه باي مكان حتى وبالبيت خو البنات حتى بالشرطة دشه هالدور تخصص اداري تبون صبيان !!

    مردي للبيت اذا خذيت مليلاردي مو الحين الحين بطر خخ الله لا يقول ..

    ترا امنية حياتي اصير ربة منزل بالاسم :)

    عيب الخاص شوتي بيزه يعني باجر يحطون المسرحين وانا معاهم خخخ ..

    لا الحكومه محلك سر :(

    لا والله افضل هيئلت خاصة اضمن كاستقرار وظيفي ونفس الرواتب تقريبا ..

    مشكوره يابختي..

    ردحذف
  13. فضفضي يارورو فضفضي
    اللي يحر انج تتتعبين سنين و منين اخهر شي تسكر البيبان بويهج و تكسر مياديفج وتموت احلامج :(
    مادري ليش عندهم هالنظريه السلبيه المتخلفه عن التخصص عجبي
    شسوي ؟ انا حاليا محبطه من كذا شغله و لو كنت بمكانج مالي الا الدعاء الله يسهل و يكتب اللي فيه الخير يارب و يعوضج
    Betty

    ردحذف
  14. هلا بتي..

    اي شورانا غير الففضه بانفجر اذا سكت استغفرالله ..

    اي ولما يصير هالشي من اكثر من صوب تموتين من القهر بعيد الشر و اكثر من حلم يتبخر جدام عينج واي قمة القهر ..

    اهو التعميم مشكلتنا شافو وحده مو زينه قالوا الكل جذي ..

    امين يارب جزاج الله خير..

    استغفرالله هالفتره حدي مقصره دينيا يبلي اكثف الله كريم ويسهلها يارب..

    مشكوره بتوي..

    ردحذف
  15. تصدقين ماصدقت انه تخصصج جذي

    :)

    مو مبين عليج

    ردحذف
  16. هلا دودو..

    ليش عاد خخ؟؟

    كله اقول اني اعلام..

    ردحذف
  17. قلبتي المواجع يا رورو اهي اهي اهي

    والله اني قبل لا اتخصص الاعلام اذكر دكتور بالاعلام مالا داعي اذكر الاسم خخ قام يمدح ويمجد بالتخصص ويقول ان مطلوب بكل مكان حتى سالت نفسي الاخ يتكلم عن تخصص الاعلام ولا علوم نووية!!

    بس الحمدالله على كل حال ان المجال الي اخترنا كنه حابينه ولا جان علوم :d

    واذا على النظره السلبيه مالج شغل فيهم رفعي راسج انتي اعلاميه ومن قلدني فقد اكدني شكو هههه

    ردحذف
  18. هلا ميد..

    اهي اهي ..

    المصيبه مو واحد اغلبهم يقولون جذي لي اخر كورس ويقول يبون صحافه عشان يكتبون وانا يارض اهتدي ماعليك ادي خخ طلع خراطي فاضي..

    لا يامعوده اشوه اعلام ولو علوم نوويه جان كلبوجنا ارهابيات تعرفين حظنا الحلو خخ..

    اي والله اشوه ع الاقل تحقق لنا حلم من احلامنا بس كان كابوس :)

    خخخخ لا بليز كله ولا الظلم خخ..

    مشكوره خيتو..

    والله يعوضنا يارب..

    حياج الله..

    ردحذف
  19. صباح الخير

    شلونج يارورو الشخبوطه الشيطونه؟

    تدرين عاد؟ كان تخصص الاعلم طق اعصي عليه .. شصار؟ 2 من رفيجاتي راحو بنوك .. مادري جان هاذي رغبتهم من الاول!!! بس اللي اعرفه انهم بسرعه توظفو ربي يهنيهم

    الحين البوينت اهيا .. انتي شلج باللي يقول ويعيد عالصحافيات؟ انتي ملكة قلمج
    بالعكس انا اشجعج على هالمجال وراح اقرالج كل تنتوفه تكتبينها .. بس توكلي وشدي حيلج عاد ودشي هالمجال ولا تتكاسلين واتمين بمكان يدفن مواهبج

    الله يعين ياخيتي .. بس والله اني اتريا منج وايد يالحلوه

    شوفي بلوق سمبوست .. خوش صحفيه كلامها يخليني احب هالمجال اكثر واتمنى لو كان مجالي

    www.sebamboot.blogspot.com


    يعطيج العافيه على هالفشة خل الحلوه ... دغدغتي مشاعري ياختي

    متابعه

    ردحذف
  20. هلا الوتين ..

    صباح النور..

    الحمدالله الله يسلمج انتي شلونج؟؟

    خخ العاده يقولون اني هاديه بالنت وبالصج لا:)

    اي ولازال مرغوب فيه كتخصص بالجامعه..

    يعني لما تخصصت وان اول مادشيت الجامعه الاغلب بيتخصص اعلام ..

    البنوك حلو بس اغلبها ربوي واستحرم احس بتطقوني..

    صح يبيله اتجرا واقدم بس ماعرف الطريقه بشوف الحيدر بس هالمره ماني دازه له ايميل خخ ..

    بعد عمري مرسي..

    ان شاءالله..

    خو ماكو الا الجريده اذا ماقبلوني افجر نفسي خخ..

    اي ان شاءالله مشكوره ع الرابط..

    والله يعافيج ويعينج بعد خو انتي مثل حالتنا يارب..

    حياج الله..

    ردحذف
  21. بعد عمري رورو قلبج متروووووسه :<

    شوفي اول شي قولي الحمدالله ان عندج وظيفه غيرج من زمان مسجل وليلحين ما قبلوه
    وبعدين ترا كلنا قاعدين في وظايف مو نفس تخصصنا
    وانا جربت قطاع البنوك .. ما انصحج ولا انصح غيرج فيه .. استعباااااد وتعب هالفاضي !

    انزين مو شرط لازم تشتغلين في جريده .. انا رفيجتي تشتغل معاي .. وهم تكتب في جريده مقالات وتسوي تحقيقات بس باسم وهمي هيهيهيهيهي

    وعلى الفلم .. ترا ما نسيته .. ناااااطرته موتطولين :)

    ردحذف
  22. هلا فيشه..

    من ناحية متروس متروس..

    اهو ترا قبلون علبو انه معدلاتنا تعتبر عاليه الا عاليه خخ..

    مو سالفه مو نفس التخصص سالفة مو مرتاحه مو لاقيه نفسي فيه ماكو تقدير ..

    خخخ وناسه ..

    اي حتى مانسيت بحطه لج ان شاءالله..

    وحياج الله خيتو..

    ردحذف
  23. اي بس مو هلتخصص

    احسج بيبي فيس

    وعنونه :$

    مادري يمكن لانج تحبين سبونج <<< عادي على كيفي افتي ترا

    ردحذف
  24. ولكم باك دودو..

    خخ اغلب اللي دارسين الاعلام بالكويت صغار لانه بلش ب1992..

    وحياج الله خيتو..

    ردحذف

دوركم تشخبطون :)